Bakı Şəhər Mədəniyyət Baş İdarəsinin Yasamal rayon Heydər Əliyev Mərkəzində Ulu Öndər Heydər Əliyevin 100 illik yubileyinə həsr olunmuş “Heydər Əliyev və Azərbaycan  mədəniyyəti”  mövzusunda tədbir keçirilib.

Tədbir iştirakçıları ilk öncə muzey bölməsində Ulu Öndər Heydər Əliyevin büstü önünə gül dəstələri qoyaraq, əziz xatirəsini  yad ediblər.

Azərbaycan Respublikasının Dövlət Himninin səsləndirilməsi ilə başlanan tədbirdə Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.

Sonra “Heydər Əliyev və Azərbaycan mədəniyyəti”, “1920-80-ci illərdə Heydər Əliyevin musiqi mədəniyyətinə olan qayğı və diqqəti”, “Milli ənənələrin qorunmasında Heydər Əliyevin rolu”, “Heydər Əliyev obrazı ilmələrin gözü ilə”, “Heydər Əliyev və muzeylər” mövzularında  çıxışlar dinlənilib.

Tədbirin bədii hissəsində Əməkdar artist Təhmiraz Şirinov tarzən Mehman Mikayılov və kamança ifaçısı Cahandar Mikayılovun müşayiəti ilə xalq mahnısı və təsniflərlə, Ulu Öndərin sevdiyi mahnılarla çıxış edib.

Sonda Azərbaycan Dövlət Uşaq Filarmoniyasının rəqs kollektivinin ifasında rəqslər nümayiş olunub, Ulu Öndərin xatirəsinə ithaf olunan “Xalq Heydər söyləyəcək” mahnısı səsləndirilib.