Bakı Şəhər Mədəniyyət Baş İdarəsinin təşkilatçılığı ilə Yasamal rayon Heydər Əliyev Mərkəzində "Hadrut, sən azadsan!" sənədli filmi nümayiş olunub.

Film nümayişində 2 nömrəli Bakı Baza Tibb Kollecinin müəllim və tələbələri iştirak ediblər.

İlk öncə tələbələr Ümummilli lider Heydər Əliyevin zəngin siyasi irsini əks etdirən ekspozisiya zalı ilə tanış olublar.

Tələbələrə 27 sentyabrda başlayan Vətən müharibəsində cəmi 44 gün ərzində Müzəffər Ali Baş Komandan İlham Əliyevin rəhbərlik etdiyi şanlı Azərbaycan Ordusunun zabit və əsgərlərinin torpaqlarımızı  işğaldan azad edərək şanlı tarix yazmasından danışılıb, film haqqında məlumat verilib.

Sonra tələbələr “Hadrut, sən azadsan!" sənədli filmini izləyiblər.

 Film Mədəniyyət Nazirliyi yanında Azərbaycan Respublikası Kino Agentliyinin sifarişi ilə Bakı Media Mərkəzi və “Azərbaycanfilm” kinostudiyası tərəfindən istehsal edilib. Filmin baş prodüseri Arzu Əliyeva, prodüserləri Orman Əliyev və Nazim Hüseynov, ssenari müəllifi Rasim İsmayılov, quruluşçu rejissoru Cavidan Şərifov, quruluşçu operatorları Ziya Babayev və Əli Əliyevdir.

Filmdə 2020-ci ilin 44 günlük Vətən müharibəsinin parlaq səhifələrindən olan Xocavənd rayonunun Hadrut qəsəbəsinin düşmən işğalından azad olunması (9 oktyabr) əməliyyatından bəhs edilir.

Film boyu real döyüş kadrları ilə bərabər, bütün qoşun növlərinin, əsasən də xüsusi təyinatlıların aparıcı rol oynadığı hərbi proseslərdə təkrarolunmaz hərbi fəndlər, döyüş səhnələri imitasiya olunaraq lentə alınıb.