Bakı Şəhər Mədəniyyət Baş İdarəsi Bakı Uşaq Teatrının “Günay” Uşaq Teatr-Studiyası Rusiyada keçirilən “Millətin qızılı” Beynəlxalq Festival-Müsabiqəsində Azərbaycanı uğurla təmsil edib. Teatrın mətbuat xidmətindən Trend Life-a verilən məlumata görə, müsabiqə Moskva ətrafında, Rusiya Federasiyası Prezidenti İşlər İdarəsinin İstirahət bazasında keçirilib.

Festival-müsabiqənin münsiflər heyətinin üzvləri Rusiyanın tanınmış incəsənət xadimləri, ali məktəblərin professor və müəllimləri olub.

“Günay” Uşaq Teatr-Studiyası Azərbaycanı layiqincə təmsil edərək, festival-müsabiqədə dahi Azərbaycan şairi və mütəfəkkiri İmadəddin Nəsiminin 650 illiyinə həsr olunmuş tamaşanı təqdim ediblər. Əsər tamaşaçılar tərəfindən gözəl qarşılanıb və səlahiyyətli münsiflər heyəti tamaşanı I dərəcəli laureat adına layiq görüb.

Teatrın Festivalda təqdim etdiyi ikinci tamaşa – “Qızıl açar” da I dərəcəli laureat adını alıb.

“Günay” teatrı həmçinin bütün nominasiyalarda ayrı-ayrı nömrələrlə çıxış edərək çoxsaylı mükafatlar alıb. “Bədii qiraət” bölməsinin “Solo” nominasiyasında Veronika Baxoldina, İvan Telegin, Leyla Mürşüdova I dərəcəli laureat, Teymur Tağıyev, Leyla Əliyeva, Nigar Məmmədli, Leyla Mürşüdova və Tamerlan Yarməmmədov II dərəcəli laureat, Teymur Nurullazadə və Məryəm İbrahimova isə III dərəcəli laureat adlarına layiq görülüblər. 

“İnstrumental ifa” nominasiyasında III dərəcəli laureat adını kamança ifaçısı Manisə Bağırova qazanıb. “Vokal” nominasiyasında I dərəcəli laureat adlarını Tuncay Həmidli, həmçinin Aylin və Nəzrin Hüseynli bacıları, II dərəcəli laureat adını isə Əzizə Məhərrəmova və Mişel Məhəmmədova alıblar.

“Xoreoqrafiya” (ansambl) nominasiyasında “Günay” teatrı “Türk rəqsi”nə görə II dərəcəli laureat  və “Balaca aşbazlar” rəqsinə görə III dərəcəli laureat olublar. “Xoreoqrafiya” (solo) nominasiyasında isə I dərəcəli laureat adını Zərifə Cəfərova qazanıb.

“Günay” Uşaq Teatr-Studiyası Festivala 21 gənc aktyorla qatılıb. Teatrın rəhbəri, rejissoru, ssenaristi və musiqi tərtibatçısı Larisa Tarusova, xoreoqrafı isə Günəş Talıbovadır.

(Müəllif: Cani Babayeva)