XƏBƏRLƏR
MƏLUMAT
“Günay” teatr-studiyası “AMBERSTAR 2019” Beynəlxalq İncəsənət Müsabiqəsinin “Qran-Pri” mükafatını qazanıb
ÜMÜMİ XƏBƏRLƏR
28/08/2019 02:15

Bakı Şəhər Mədəniyyət Baş İdarəsi Bakı Uşaq Teatrının nəzdində fəaliyyət göstərən “Günay” teatr-studiyası “AMBERSTAR 2019” Riqa-Stokholm-Riqa 10-cu yubiley Beynəlxalq İncəsənət Müsabiqəsində Azərbaycanı təmsil edib.

Festival-müsabiqə 16-20 avqust tarixlərində keçirilib. Müxtəlif ölkələrdən gənc istedadların iştirakı ilə baş tutan Festivalın açılışı Latviyanın paytaxtı Riqada, daha sonra isə18-19 avqust tarixlərində Riqa-Stokholm-Riqa kruiz turu ilə səyahət edən "Romantika" gəmisində keçirilib.

“Günay” studiyasıFestival-müsabiqədə "Kitabi-Dədə-Qorqud" dastanı əsasında hazırlanmış "Üç ocaq"tamaşasını nümayiş etdirib.Tamaşa münsiflər heyətinin  və tamaşaçıların təkcə marağına deyil, hətta göz yaşlarına səbəb olub.

Müsabiqənin nəticələri Qala konsertdə açıqlanıb. Festival- müsabiqəninQran-primükafatı Azərbaycanı layiqincə təmsil edən “Günay” studiyasına təqdimolunub.

Bütün kollektiv festivalın medalı ilə və 100 avro sertifikatı ilə təltif olunub. Gənc aktyorlardan- Leyla Əliyeva, Leyla Qədimli, Təyyar Cəbrayılbəyov və Tuncay Həmidli ən yaxşı rola görə diplomla təltif olunublar. Studiyanın bədii rəhbəri, ssenari müəllifi və quruluşçu rejissoru Larisa Viktorovna Tarusova festivalın idarə Heyəti tərəfindən münsif seçilib, gənc istedadların inkişafındakı fəaliyyətinə və beynəlxalq mədəni əlaqələrin möhkəmlənməsinə göstərdiyi köməkliyə görə beynəlxalq diplom-sertifikatla təltif olunub.

Müsabiqə ərəfəsində - 17 avqust tarixində  “Günay” studiyasının gənc artistləri Riqa şəhərində tamaşa-konsert proqramı ilə çıxış ediblər. Azərbaycan Səfirliyinin dəstəyi və gənc diaspor fəallarının təşkilatçılığı ilə Latviya Universitetinin Akademik Kitabxanasında keçirilmiş tədbirə Azərbaycan icması və Latviya ictimaiyyətinin nümayəndələri dəvət olunublar. 

Proqramı giriş sözü ilə açan Əməkdar incəsənət xadimi, professor Zümrüd Dadaşzadə Azərbaycanın zəngin teatr ənənələri və musiqi mədəniyyəti barədə tamaşaçılara məlumat verib, teatr sənətinin gənclərin estetik tərbiyəsinin formalaşmasındakı rolundan bəhs edib. Bu istiqamətdə Bakı Uşaq Teatrının “Günay” studiyasının fəaliyyətini yüksək qiymətləndirən Z.Dadaşzadə, Azərbaycan teatr sənəti ənənələrinin təbliğində onlara uğurlar arzu edib. 

Həmçinin çıxış edən “Ocaq” Azərbaycan Mədəniyyət Mərkəzinin sədri Roman Əliyev bugünkü tədbirin xalqımızın tarixi-mədəni irsinin təbliği baxımından əhəmiyyətini vurğulayıb, “Günay” uşaq yaradıcılıq studiyasının gənc istedadlarına uğurlar arzu edib.   

Sonra çıxış edən “Günay” teatr-studiyasının rəhbəri Larisa Tarusova studiyanın fəaliyyəti və gənc artistləri barədə danışıb, bugünkü tədbirin təşkilatçılarına öz təşəkkürünü bildirib. 

Çıxışların ardınca “Günay” studiyasının gənc istedadları öz bacarıqlarını nümayiş etdiriblər.

Konsert zamanı Azərbaycanın milli rəqs və musiqi nümunələri ifa edilib, şerlər səsləndirilib. Xüsusilə Kitabi-Dədə Qorqud eposunun motivləri əsasında səhnələşdirilən “Üç Tonqal” tamaşası və “Arşın mal alan” operettasından qızların rəqsi tamaşaçıların böyük rəğbətini qazanıb.  

Proqramın yekununda çıxış edən tədbirin əsas təşkilatçısı, Baltikyanı ölkələrdə yaşayan azərbaycanlıların Koordinasiya Şurasının Latviyadan olan üzvü Elnur Rəhimov “Günay” studiyasının gənc istedadlarına öz təşəkkürünü bildirmiş, xalqımızın tarixi, milli və mənəvi dəyərlərinin təbliğində bütün soydaşlarımıza uğurlar arzu edib.  

Konsert proqramından sonra qonaqlara Azərbaycan milli mətbəxi nümunələrindən ibarət ziyafət verilib.

Festivaldan sonra isə Azərbaycanın Latviyadakı səfiri cənab Cavanşir Axundov "Günay" studiyasının kollektivini qəbul edib və iştirakçıları bu uğura görə təbrik edib. Bakı Uşaq Teatrının studiyasına təşəkkürnamə təqdim edib.

Azərbaycanın səfiri cənab Cavanşir Axundov L.Tarusovaya gənc aktyorların öz ölkələrinin layiqli vətəndaşları kimi yetişəcəklərinə və Azərbaycan mədəniyyətini daim təbliğ edəcəklərinə inandığını bildirib.

Bakı Uşaq Teatrının Günay teatr-studiyası Riqada olduğu müddət ərzində göstərilən daimi diqqət və qayğıya görə Azərbaycan Respublikasının Latviyadakı Səfiri Cavanşir Axundova, Zümrüd Dadaşzadəyə, Elnur Rəhimova və bütün səfirlik əməkdaşlarına dərin minnətdarlığını bildirib.

Baxış sayı: 45561