Bakı Şəhər Mədəniyyət Baş İdarəsinin tabeliyində olan Yasamal rayon Heydər Əliyev Mərkəzində akademik, görkəmli alim, oftalmoloq Zərifə Əliyevanın anadan olmasının 102 illiyinə həsr olunmuş “Gözlərə nur saçan əllər” adlı tədbir keçirilib.

Tədbirdə rəsmilər, elm xadimləri, ziyalılar, 1 nömrəli Bakı Tibb Kollecinin və 2 nömrəli Bakı Baza Tibb Kollecinin müəllim və tələbələri, 53 nömrəli tam orta məktəbin müəllim və şagirdləri iştirak ediblər.

Əvvəlcə qonaqlar Mərkəzin Muzey bölməsində Ümummilli lider Heydər Əliyevin büstünü ziyarət ediblər.

Tədbir Azərbaycan Respublikasının Dövlət Himni səsləndirilməsi ilə başlanıb. Görkəmli alim Zərifə Əliyevanın əziz xatirəsi bir dəqiqəlik sükutla yad edilib.

Tədbirdə çıxış edənlər zəngin və mənalı ömür yolu keçən Zərifə xanımın çoxillik səmərəli fəaliyyəti, fundamental axtarışları ilə Azərbaycan tibb elminə verdiyi töhfələrdən söz açıblar. Alim kimi elmi axtarışlarında böyük uğurlar qazanan Zərifə Əliyeva barəsində söhbət açarkən onun xalqımızın tarixdən gələn ailə ənənələrinə sadiqliyi xüsusi qeyd edilib.

Daha sonra Zərifə Əliyevaya həsr olunmuş “Nurlu əllər” adlı videoçarx nümayiş olunub.

Sonda şagirdlərin ifasında ədəbi-bədii kompozisiya təqdim edilib.