Bakı Şəhər Mədəniyyət Baş İdarəsinin Ə.Əmirov adına Mədəniyyət Sarayında 2 fevral – Azərbaycan Gəncləri Günü münasibəti ilə "Gəncliyimiz Gələcəyimiz" adlı tədbir keçirilib.

İlk öncə Azərbaycan Respublikasının Dövlət Himni səsləndirilib, torpaqlarımızın azadlığı uğrunda şəhidlik  zirvəsinə ucalan vətən oğullarının əziz xatirəsi bir dəqiqəlik sükutla yad edilib.

Çıxış edənlər gəncləri bu gün münasibətilə təbrik ediblər. Bildirilib  ki, gənclərimiz əsası 26 il öncə ümummilli lider Heydər Əliyev tərəfindən qoyulan Azərbaycan Gəncləri Gününü artıq qalib bir ölkənin vətəndaşları kimi qeyd edirlər.

Sonra ümummilli lider Heydər Əliyevin gənclərlə olan görüşlərini əks etdirən videoçarx nümayiş olunub.

Tədbirin bədii hissəsində Mədəniyyət Sarayının solistlərinin və özfəaliyyət kollektivinin maraqlı ifaları tədbir iştirakçıları tərəfindən alqışlarla qarşılanıb.

Sonda fəal gənclərə diplom və hədiyyələr təqdim edilib.