“Leyla Khazary Art Gallery” müasir rəsm qalereyasında gənc rəssam, Azərbaycan Dövlət Rəssamlıq Akademiyasının üçüncü kurs tələbəsi, beynəlxalq müsabiqələr laureatı Leyla Hacılının fərdi sərgisinin açılışı olub.

AZƏRTAC xəbər verir ki, sərgidə müəllifin fəal yaradıcılıq dövrünün son bir neçə ilində yaratdığı rəsmlər təqdim olunub.

Açılış mərasimində çıxış edən qalereyanın rəhbəri Leyla Xəzəri qeyd edib ki, sərgidə müxtəlif rəngarəng tablolar təqdim edilir.

“Mədəniyyət” jurnalının baş redaktoru Zöhrə Əliyeva, rəssam İlham Mirzəyev və Əminə Hacılının anası Səbinə xanım müəllifin çoxşaxəli yaradıcılığından bəhs edib, onun müxtəlif üslublar və texnikalarla həyata keçirdiyi eksperimentləri diqqətə çatdırıblar. Çıxış edənlər gənc rəssamın böyük potensiala malik olduğunu qeyd ediblər.

Əminə Hacılı sərginin bütün iştirakçılarına minnətdarlığını bildirib. Rəssam diqqətə çatdırıb ki, sərgidə müxtəlif üslublarda – akademik tərzdən tutmuş müasir tendensiyaya qədər çeşidli texnologiyalardan istifadə etməklə hazırlanmış əsərləri görmək olar. O əlavə edib ki, burada akril və quaş rəsmləri, akvarellər, keramika, eləcə də portretlər, mənzərələrin natürmortları və daha çox əsərləri görmək olar.

Rəssamın özünün də etiraf etdiyi kimi, onun ilham mənbəyi həyat, maraqlı insanlarla ünsiyyət, səyahət, təbiətin qoynunda gəzmək, kitab oxumaq və ya filmlərə baxmaqdır.

Tədbirin qonaqları rəssamın əsərlərinin rəngarəngliyinə, onun təxəyyülünə və istedadıma heyran qalıblar. Qeyd edək ki, sərgi gənc rəssamın anadan olmasının iyirminci ildönümü şərəfinə təşkil edilib və bu, tədbirin adında da öz əksini tapıb.