Almaniya musiqi nəşriyyatı “Sikorski Musicverlage”nin əsasını qoyan və uzun illər ona rəhbərlik edən professor Qans Sikorski deyib: “Firəngiz Əlizadə müsəlman dünyasının yeganə nümayəndəsidir ki, Avropa və Amerikanın konsert salonlarında və musiqi həyatında yüksək nüfuza malik bəstəkardır”. Onun bu fikirləri Almaniyada təşkil olunmuş konsertlərdə bir daha öz təsdiqini tapır. Belə ki, bu yaxınlarda Firəngiz Əlizadənin yeni əsəri - “Overcoming” (“Müqavimət”) Almaniyanın Bamberq, Münhen və Dortmund şəhərlərində Laxav Şaninin rəhbərliyi ilə böyük simfonik orkestrin ifasında səslənib. Dirijorların beynəlxalq müsabiqəsində I yer qazanmış Laxav Şani əfsanəvi Zubin Metanın varisi olaraq, dünyanın bir çox məşhur simfonik orkestrləri ilə çıxışlar edir.

AZƏRTAC xəbər verir ki, Firəngiz Əlizadənin Bamberq Symphoniker kollektivinin konsertlərində səslənən əsəri musiqi hadisəsi olmaqla yanaşı, həm də siyasi amilləri özündə ehtiva edir.

Konsertlərdə Azərbaycan bəstəkarının əsəri ilə yanaşı, yəhudi bəstəkarı Paul Ben-Haimin, həmçinin alman klassiki Anton Bruknerin möhtəşəm 7-ci simfoniyası da səsləndi. Belə ki, əsərlərin müxtəlif dövrlərdə və müxtəlif məkanlarda yazılmasına baxmayaraq, bu bəstəkarların hər biri öz musiqisi ilə dünyada sülhün, əmin-amanlığın əbədi olmasını arzulayır və ifadə edir.

Konsertlərdən əvvəl Bamberq və Dortmund şəhərlərinin rəsmi şəxsləri çıxışlarında Şərqin güclü təfəkkürünə malik görkəmli bəstəkarı Firəngiz Əlizadənin müasir dünya musiqi mədəniyyətinin inkişafındakı yeri haqqında danışıblar. Bildirilib ki, səslənən əsərlərin əsas mahiyyəti dünyada sülh və əmin-amanlığın musiqi vasitəsilə tərənnümü və bu əsərlərin cəmiyyətdə humanist ideyaların inkişafına mühüm təsiri ilə bağlıdır.

Xüsusi olaraq qeyd ediblər ki, bu əsərlərin bədii-estetik təsiri gələcək həyatımızda da insanların mənəvi zənginliyinin qorunmasına təkan verəcək. “Sanki bu əsərlər gələcəyə də bir mənəvi körpüdür”,-deyə natiqlər vurğulayıblar.

Silsilə konsertlərin davamı olaraq Firəngiz Əlizadənin “Oasis” və “Dance” əsərləri Monreal şəhərində Kanadanın məşhur “Molinari” kvartetinin ifasında səslənib.

Bütün konsertlər musiqisevərlər tərəfindən böyük maraqla qarşılanıb.