Bakı Şəhər Mədəniyyət Baş İdarəsinin təşkilatçılığı ilə Azərbaycan ədəbiyyatının görkəmli nümayəndəsi, Əməkdar incəsənət xadimi Əliağa Vahidin 130 illik yubileyinə həsr olunmuş ədəbi-bədii gecə keçirilib.

Yasamal rayon Heydər Əliyev Mərkəzində keçirilən tədbirdə mədəniyyət , incəsənət xadimləri, şairlər, yazıçılar, ziyalılar və ictimaiyyət nümayəndələri iştirak ediblər.

Tədbirdə Əliağa Vahidin həyat və yaradıcılığı haqqında məlumat verilib, videoçarx nümayiş olunub.

Gecədə çıxış edənlər bildiriblər ki, Əliağa Vahid müasir Azərbaycan ədəbiyyatında qəzəl janrının görkəmli nümayəndəsidir. Ə.Vahidin sadə dildə yazdığı qəzəllərdə dərin fəlsəfi mənalar var.Onun qəzəlləri ustad xanəndələrin repertuarlarında mühüm yer tutur və sevilir.  Qeyd olunub ki,  Ə.Vahid hər zaman məşhur olan meyxana sənəti ilə də məşğul olub.

Bədii hissədə xanəndə, Beynəlxalq və Respublika müsabiqələri laureatı, kitabxananın Fəxri oxucusu Maya Cəbrayılova, 22 nömrəli Uşaq Musiqi Məktəbinin müəllim və şagirdləri, Azərbaycan Milli Konservatoriyası nəzdində İncəsənət Gimnaziyasının və 225, 158, 38, 150 nömrəli tam orta məktəblərin şagirdləri çıxış ediblər.

Tədbirdə həmçinin Ə.Vahidin 130 illik yubileyi ilə əlaqədar məktəblilər arasında keçirilmiş şeir və inşa müsabiqəsinin qaliblərinə Yasamal rayon MKS-i tərəfindən təşəkkürnamə və diplomlar təqdim edilib.