Nizami Kino Mərkəzində əlilliyi olan uşaqlara həsr olunan “Fərqli fərdlər” adlı himnə çəkilən klipin təqdimatı keçirilib.

AZƏRTAC xəbər verir ki, Mədəniyyət Nazirliyinin dəstəyi, “Ümid var” İnklüziv Yaradıcılıq Birliyinin, “Uşaqların Xoşbəxt Gələcəyi” İctimai Birliyinin təşkilatçılığı ilə təqdim olunan klip “PASHA Holding”in sponsorluğu ilə ərsəyə gəlib.

Qeydi edək ki, himn Heydər Əliyev Fondunun dəstəyi, Caspian Event Organisers şirkətinin təşkilatçılığı ilə keçirilən xüsusi qayğıya ehtiyacı olan insanlara həsir olunan “Fərqli fərdlər” beynəlxalq konqresinin təşəbbüsü və sponsorluğu ilə, “Ümid var” İnklüziv Yaradıcılıq birliyinin üzvlərinin iştirakı ilə baş tutub.

Himnin musiqisi bəstəkar Tural Məmmədliyə, sözləri isə Leyla Quliyevaya məxsusdur. Himinə rejissor Ülviyyə Könül klip çəkib.

Tədbiri “Ümid var” İnklüziv Yaradıcılıq Birliyinin sədri Nazilə Məhərrəmova açaraq bu himlə inklüziv cəmiyyətə töhfə vermək məqsədi daşıdığını vurğuladı: “İnklüziv cəmiyyətin formalaşmasına təkan verəcək “Fərqli fərdlər” layihəsi əlilliyi olan şəxslərin inteqrasiyasına, onların özlərini realizə etmələrinə geniş imkanlar açacaq. Maarifləndirici xarakter daşıyan bu layihənin cəmiyyətdə inklüziv düşüncə toxumları səpəcəyinə əminik”.

Daha sonra klipin təqdimatı olub.

“Fərqli fərdlər” himnini ifa edən Xalq artisti Alim Qasımov, Əməkdar artist Fərqanə Qasımovayla yanaşı 15 nəfərdən ibarət inklüziv uşaq xoru və yaradıcı heyət səhnəyə çıxıb.

Sonda Milli Məclisin deputatı Ceyhun Məmmədov çıxış edərək bu layihənin inklüziv cəmiyyətin formalaşmağındakı rolundan danışıb. Xeyirxahlıq, mərhəmət, anlayış, bərabərlik, hamı üçün əlçatan mühiti yaratmağı təbliğ edən layihənin ümumilikdə yaşamaqda olduğumuz Ramazan ayının fəlsəfəsi ilə üst-üstə düşdüyünü bildirib.