Bakı Şəhər Mədəniyyət Baş İdarəsinin tabeliyində olan Xəzər rayon Mərkəzləşdirilmiş Kitabxana Sisteminin Mərkəzi Kitabxanasında azərbaycanlı qəhrəman Rahib Məmmədova həsr edilmiş “Əbədiyyətə qovuşan ömür” adlı tədbir keçirilib.

Tədbirdə Rahib Məmmədovun ailə üzvləri, qazilər, Azərbaycan Dövlət Mədəniyyət və İncəsənət Universiteti tələbələri, Abşeron Binə Peşə Liseyinin şagird və müəllim kollektivi, ziyalılar və ictimaiyyət nümayəndələri iştirak ediblər.

Əvvəlcə Azərbaycan Respublikasının Dövlət Himni səsləndirilib və şəhidlərimizin əziz xatirəsi bir dəqiqəlik sükutla yad edilib.

Tədbirdə   Rahib Məmmədovun  mənalı və qəhrəmanlıqla dolu həyatından söhbət açılıb. Məlumat verilib ki, Rahib Gülmalı oğlu Məmmədov 1967-ci il avqustun 25-də Ağdam rayonunun Mahrızlı kəndində anadan olub. 1987-ci ildə hərbi xidmət keçdiyi Gürcüstanın Xobi rayonunun Çaladidi kəndində böyük fədakarlıq göstərərək, təbii fəlakət zamanı 28 sakini seldən xilas edib və qəhrəmanlıqla həlak olub. Ölümündən sonra “Qırmızı Ulduz” ordeni ilə təltif olunub.

Bildirilib ki, Azərbaycan vətəndaşının Xobidə insanları xilas etməsi və bu zaman qəhrəmancasına həlak olması onun mənsub olduğu xalqın qəhrəmanlıq nümunəsidir.

Sonra tədbir bədii hissə ilə davam edib.