Dekabrın 10-da Bakı Şəhər Mədəniyyət Baş İdarəsinin tabeliyində olan Suraxanı rayon Heydər Əliyev Mərkəzində Ümumilli lider Heydər Əliyevin anım gününə həsr edilmiş “Əbədi Heydər Əliyev dühası” adlı tədbir keçirilib.

Tədbirdə rəsmilər, şəhid ailələri, qazilər, veteranlar, mədəniyyət və təhsil müəssisələrinin nümayəndələri, məktəblilər iştirak ediblər.

İlk olaraq Azərbaycan Respublikasının Dövlət Himni səsləndirilib. Sonra Ümumilli lider Heydər Əliyevin əziz xatirəsi bir dəqiqəlik sükutla yad edilib.

Tədbirdə çıxış edənlər bildiriblər ki, Ulu Öndər Heydər Əliyevin zəngin və çoxşaxəli fəaliyyəti xalqımızın yaddaşında əbədilik qazanıb. O, təkcə Azərbaycan xalqının deyil, həm də dünya xalqlarının şəxsiyyətinə böyük rəğbət bəslədiyi bir siyasi lider idi. Ölkəmizə rəhbərlik etdiyi bütün dövrlərdə Heydər Əliyev Azərbaycanın hərtərəfli inkişafına, qüdrətlənməsinə öz töhfəsini verib, dövlətimizin gələcək inkişaf strategiyasını müəyyən edib. Bu gün Ümumilli liderin ideyaları Müzəffər Ali Baş Komandan cənab Prezident İlham Əliyev tərəfindən uğurla davam etdirilir.

Tədbirin bədii hissəsində 3 nömrəli Uşaq-Gənclər İnkişaf Mərkəzinin dərnək üzvləri və 327 nömrəli tam orta məktəbin şagirdləri çıxış ediblər.

Sonda tədbir iştirakçıları Mərkəzin ekspozisiya zalında Ümumilli liderin zəngin irsini əks etdirən materiallarla tanış olublar.