Yalçın Vasif oğlu Adıgözəlov 1959-cu il noyabr ayının 4-də Bakı şəhərində görkəmli bəstəkar, Xalq artisti Vasif Adıgözəlovun ailəsində anadan olub.

Musiqi ilə məşğul olmağa atasının rəhbərliyi ilə başlayıb. Y.Adıgözəlov pianoçu kimi Bülbül adına Orta-İxtisas Musiqi Məktəbini bitirərək, 1982-ci ildə Bakı Musiqi Akademiyasında fortepiano ixtisası üzrə professor Rauf Atakişiyevin sinfində təhsil alıb.

1983-cü ildə N.A.Rimski-Korsakov adına Leninqrad Dövlət Konservato­riyasına dirijorluq ixtisası üzrə daxil olub, 1984-1989-cü illərdə opera simfonik dirijorluğu ixtisası üzrə ma­estro İ.A.Musindən dərs alıb. Kon­servatoriyanı bitirdikdən sonra Bakı şəhərinə qayıdıb və Müslüm Maqo­mayev adına Azərbaycan Dövlət Filar­moniyasının (indiki Azərbaycan Dövlət Akademik Filarmoniyası) Ü.Hacıbəyli adına Azərbaycan Dövlət Simfonik Orkestrində dirijor kimi çalışmağa baş­layıb.

1991-1992-ci illərdə Vyana Musiqi Akademiyasında professor Karl Es­terrayherin yanında təcrübə keçib. 1991-1998-ci illərdə Ü.Hacıbəyli adına Azərbaycan Dövlət simfonik orkestrinin bədii rəhbəri və baş diri­joru kimi çalışıb. Bu kollektivlə həm doğma vətəndə, həm də müxtəlif ölkələrdə klassik simfonik və müasir bəstəkarların, xüsusilə də azərbaycanlı muəlliflərin əsərləri ilə geniş konsert fəaliyyəti göstərib.

Yalçın Adıgözəlov 1997-ci ildən pe­daqoji fəaliyyətlə məşğul olur, Bakı Musiqi Akademiyasının dosenti, 2000-ci ildən isə dirijorluq kafedrasının profes­sorudur.

2001-ci ildən maestro Y.Adıgözəlov böyük opera teatrlarından biri olan İs­tanbul Opera və Balet Teatrının dirijo­rudur.

Yalçın Adıgözəlov Rusiya Milli Or­kestri, Çaykovski adına Böyük Sim­fonik Orkestri, Sankt-Peterburq Filar­moniyasının Orkestri, ABŞ, İspaniya, Avstriya, Belçika, Rumıniya və bir çox ölkələrin aparıcı simfonik orkestrləri ilə əməkdaşlıq etmiş, dünya şöhrətli M.Rostropoviç, N.Petrov, S.Stadler, İ.Moniqetti kimi tanınmış musiqiçilərlə çıxış edib.

Azərbaycan Simfonik Orkestri və P.İ.Çaykovski adına Böyük Simfonik orkestr ilə birgə ABŞ, Rusiya, İngiltərə və Türkiyədə buraxılmış səkkiz kompakt-disk yazdırıb.

2004-cü ildə Azərbaycan Dövlət Akademik Opera və Balet Teatrında Vasif Adıgözəlovun “Natəvan” opera­sının musiqi rəhbəri və dirijoru olub.

Yalçın Adıgözəlov 2007-ci ildə Azərbaycan Respublikasının “Əməkdar incəsənət xadimi”, 2012-ci il sentyabr ayının 14-də “Xalq artisti” fəxri adları­na layiq görülmüş, 2012-2017-ci illərdə Prezident Mükafatçısı olub.