AMEA Folklor İnstitutunun Elmi şurasının qərarı ilə “Dədə Qorqud” elmi-ədəbi toplusunun 86-cı nömrəsi nəşr olunub.

İnstitutdan AZƏRTAC-a bildirilib ki, filologiya elmləri doktoru, professor Ramazan Qafarlının redaktorluğu ilə ildə dörd dəfə nəşr olunan jurnalın bu nömrəsində elmi məqalələr, Azərbaycan folklorundan yeni nümunələr, türk xalqları folklorundan örnəklər və başqa yazılar öz əksini tapıb.

Toplunun “Qorqudşünaslıq: axtarışlar, aşkarlamalar” rubrikasında “Kitabi-Dədə Qorqud” və “Oğuz xaqan” Oğuznamələrində türk etnik-mədəni gerçəkliyi”, “Kitabi-Dədə Qorqud” dastanında əxlaq konsepsiyası və onun pedaqoji-psixoloji əhəmiyyəti” başlıqlı məqalələr oxucuların ixtiyarına verilib.

“Folklorşünaslıq: problemlər, tədqiqlər” bölməsində “Azərbaycanın fikri, milli və ədəbi oyanışı”, “Dəyişən folklor paradiqmasında müasir şəhər folkloru”, “Bahariyyə motivli Azərbaycan, türk və özbək atalar sözlərinin müqayisəli tipologiyası”, “Göyçə aşıq mühitinin banisi – Ağ Aşıq”, “Füzuli qəzəllərində mifoloji obrazların çoxçalarlı ifadəsi”, “Nəbi Xəzri poeziyasına folklor prizmasından baxış”, “Qarabağda mövcud olmuş tayfaların tarixi-mədəni səciyyəsi”, “Nizami Gəncəvi yaradıcılığında qarğışlar, inanclar, rəvayətlər”, “Aşıq Sərraf Qasımın yaradıcılığının poetik xüsusiyyətləri”, “Koroğlu” eposunda paremioloji vahidlərin funksiyası”, “Folklorda və yazılı ədəbiyyatda “Durna” motivi və riyazi modelin proyeksiyası”, “Azsaylı rutul xalqının folkloruna bir baxış”, “Qarabağ bayatılarının quruluşu” adlı məqalələrlə tanış olmaq mümkündür.

Toplunun “Azərbaycan folklorundan yeni nümunələr” rubrikasında Qərbi Azərbaycan folklor örnəkləri, “Cənubi Azərbaycan folklorundan nümunələr” bölməsində Qaşqay folklor nümunələri, “Türk xalqlarının folklorundan yeni nümunələr” bölməsində isə İraq- türkman folklor örnəkləri yer alıb.

Jurnalın “Yeni nəşrlər və rəylər” rubrikasında “Nizami poeziyasında məkan, zaman və kəmiyyət vəhdəti (folklor və mifoloji düşüncə kontekstində)” monoqrafiyası haqqında rəy təqdim olunub.

Xatırladaq ki, “Index Copernicus” sisteminə daxil olan “Dədə Qorqud” elmi-ədəbi toplusunda məqalələr 2023-cü ildən həm də DOI indeksi ilə dərc edilir.