Аzərbаусаnın Özbəkistandakı səfirliyinin nəzdindəki Heydər Əliyev adına Azərbaycan Mədəniyyət Mərkəzinin təşəbbüsü ilə tanınmış özbək tədqiqatçı-jurnalisti Şarofiddin Tolaqanovun Daşkənddə özbək dilində çap olunmuş “Olovlar Yurti - Ozarbayjon” (Odlar Yurdu Azərbaycan) kitabının təqdimatı olub.

Mərkəzdən AZƏRTAC-a bildirilib ki, mərasim Əlişir Nəvai adına Milli Kitabxanada keçirilib.

Tədbirdə çıxış edən səfir Hüseyn Quliyev bildirib ki, Şarofiddin Tolaqanov səfirliyimizlə daim əməkdaşlıq edir, bir neçə dəfə ölkəmizdə səfərdə olub, işğaldan azad edilmiş torpaqlarımıza gedib, erməni vandalizmini öz gözləri ilə görüb. O, nəşrdə Azərbaycan xalqı, dövlətçilik tarixi, mədəniyyəti, incəsənəti, ədəbiyyatı, milli bayramları, hüzn günləri, Ümummilli Lider Heydər Əliyev, Azərbaycan Respublikasının Prezidenti İlham Əliyev, Birinci vitse-prezident Mehriban xanım Əliyeva, mədəniyyət mərkəzi olan Şuşa, Qarabağ, torpaqlarımızın erməni işğalından azad olunması, Azərbaycan-Özbəkistan tarixi, mədəni əlaqələri haqqında geniş məlumat verildiyini söyləyib.

Özbəkistanın UzA Milli İnformasiya Agentliyinin baş direktoru Abdusaid Koçimov Azərbaycanla Özbəkistan arasında mədəni əlaqələrin tarixindən, şair və yazıçılarımızın dostluğundan danışıb, Azərbaycan və özbək xalqlarının böyük oğlu, özbək ədəbiyyatının klassikinə çevrilən Maqsud Şeyxzadənin əsərləri barədə məlumat verib. O, Şarofiddin Tolaqanovun “Odlar Yurdu Azərbaycan” kitabının son illərdə Azərbaycan haqqında Özbəkistanda yaranan ən yaxşı əsər olduğunu vurğulayıb.

Əlişir Nəvai adına Milli Kitabxananın direktoru Umida Taşbayeva, şair və yazıçı Tulkin Eşbek, jurnalist İslam Zakirov və başqaları tanınmış jurnalistin yaradıcılığı haqqında məlumat verib, onu Azərbaycan sevdalısı olan jurnalist kimi xarakterizə ediblər.