Bu gün Azərbaycanın teatr və kino sənətinin tanınmış nümayəndəsi, Azərbaycan Respublikası Prezidentinin fərdi təqaüdçüsü, Xalq artisti Nodar Şaşıqoğlunun anadan olmasının 98 ili tamam olur.

O, Şükin adına Moskva Teatr Məktəbində kino və teatr aktyorluğu fakültəsində təhsil alıb. Sənət fəaliyyətinə Moskva şəhərində başlayan Nodar Şaşıqoğlu Dram və Komediya Teatrında, “Azərbaycanfilm”, “Mosfilm”, “Dovjenko“, “Odessa“ və digər kinostudiyalarda, Puşkin adına Leninqrad Akademik Dram Teatrında, Səməd Vurğun adına Azərbaycan Dövlət Rus Dram Teatrında çalışıb. “Uzaq sahillərdə”, “Əsl dost”, “Bizim küçə”, “Telefonçu qız” və digər filmlərdə yaddaqalan obrazlar yaradıb. “Uzaq sahillərdə” filmində Azərbaycan xalqının igid oğlu, Sovet İttifaqı Qəhrəmanı Mehdi Hüseynzadənin (Mixaylo) obrazını yaradıb. Görkəmli aktyor 2007-ci ildə “Şöhrət” ordeninə layiq görülüb.

Nodar Şaşıqoğlu 2013-cü ildə vəfat edib.