Tanınmış teatr və kino aktyoru Məmmədsadıq Nuriyev 5 mart 1919-cu ildə Bakı şəhərində anadan olub. 1928-ci ildə atası onu Bakıda Bədəl bəy Bədəlbəyovun məktəbinə qoyub. Orada o dövr üçün orta sayılan tam təhsil alan Məmmədsadıq Nuriyev 1935-ci ildə Mirzə Fətəli Axundov adına Azərbaycan Dövlət Teatr Məktəbinin aktyorluq fakültəsinə daxil olur. Aktyor sənəti dərsini görkəmli aktrisa Fatma Qədridən öyrənib. 1937-ci ildə Məktəbi bitirib.

Məmmədsadıq Nuriyev Teatr Məktəbində oxuyarkan birinci kursun əvvələrində Milli Dram Teatrının tamaşalarında çıxış edir. O, burda kütləvi səhnə epizodlarında, sözsüz rollarda, əsərlərin tamaşasında iştirak edib.

1938-ci il aprel ayının 28-də rejissor Ağəli Dadaşovun hazırladığı gürcü ədibi Georgi Mdivaninin "Vətən namusu" dram tamaşasında Uşaq rolunu oynayıb. Teatr məktəbini 1937-ci ildə bitirib. Xalq Maarif Komissarlığı İncəsənət İşlər İdarəsinin göndərişi ilə Cəfər Cabbarlı adına İrəvan Dövlət Dram Teatrına gedib. M.Nuriyev səkkiz ilə yaxın bu teatrda aktyor kimi işləyib. Daha sonra Cəfər Cabbarlı adına Gəncə Dövlət Dram Teatrında (1946-1950), Azərbaycan Dövlət Filarmoniyası nəzdindəki musiqili komediya, estrada ansamblında (1950-1956), Azərbaycan Dövlət Musiqili Teatrında (1956-1975), az müddət Milli Dram Teatrında çalışıb. Səhnə dostları arasında "Vücud" ləqəbi ilə tanınıb.

Məmmədsadıq Nuriyev 1975-ci ildə vəfat edib. Aktyor "O olmasın, bu olsu" (1956) – bazardakı adam, "Koroğlu" (1960) – kosa Səfər, "Böyük dayaq" (1962) – kababçı, "Əhməd haradadır?" (1963) – fəhlə Əhməd, "Sehrli xalat" (1964) – tacir, "Ulduz" (1964) – Bayram, "Sən niyə susursan?" (1966) – Arıq, "Poçt qutusu" (1967) – Kəndli, "Qanun naminə" (1968) – Sərrafzadə, "Uşaqlığın son gecəsi" (1968) – Davud, "Bizim Cəbiş müəllim" (1969) – Qaçqın, "General" (1970) – aktyor, "Sevil" (II film) (1970) – Məmmədəlibəy, "Yeddi oğul istərəm" (1970) – Kosa, "Axırıncı aşırım" (1971) – Kəndli, "1001-ci qastrol" (1974) – aktyor, "Aktrisanın təbəssümü" (1974) – Əli, "Tütək səsi" (1976) filmində isə Səlim obrazını ifa edib.

Məmmədsadıq Nuriyev sözsüz və epizodik rolları mimikası, susmağı və hərəkəti ilə elə yaradıb ki, onlar baş rollarla eyni səviyyədə tamaşaçı yaddaşında qalıb. Aktyorun ekranlarda ifadə etdiyi sözlər isə xalq arasında aforizmə çevrilərək nəsildən - nəslə keçir.

Aktyor Yaşar Nurinin atasıdır.

Məmmədsadıq Nuriyev 1975-ci ildə Bakıda vəfat edib.