Zemfira Quliyeva 1937-ci ilin noyabrın 23-də Gəncədə anadan olub. O, Azərbaycan Dövlət Konservatoriyasının vokal fakültəsinin solo oxu şöbəsində təhsil alıb. Aktrisa ikinci kursda oxuyanda bəstəkar Süleyman Ələsgərovun və rejissor Şəmsi Bədəlbəylinin təşəbbüsü ilə Azərbaycan Dövlət Musiqili Komediya Teatrına işə dəvət olunub. İki il bu kollektivdə çalışıb.1960–1963-cü illərdə Azərbaycan Dövlət Radiosunun xorunda, 1963-cü ildə Musiqili Komediya Teatrının aparıcı solisti kimi çalışıb. Lirik-soprano səsə malik olub. Zemfira Quliyeva otuz ildən çox Musiqili Komediya Teatrının repertuarındakı, demək olar əsas tamaşaların qəhrəman sevgili obrazlarını uğurlu ifa edib. Yaradıcılığının son bir neçə ilində isə tipik personajların səhnə surətini yaradıb. Zemfira Quliyeva 1982-ci ildə Azərbaycanın Əməkdar artisti fəxri adı ilə təltif olunub.

Aktrisa 1997-ci ildə vəfat edib.