XƏBƏRLƏR
MƏLUMAT
Bu gün əməkdar artist Ayşad Məmmədovun doğum günüdür
ÜMÜMİ XƏBƏRLƏR
06/12/2023 09:16

Aparıcı səhnə ustası Ayşad Kamal oğlu Məmmədov 6 dekabr 1954-cü ildə Mərdəkanda anadan olub. İncəsənət İnstitutunun Dram və kino aktyorluğu fakültəsində (1978-1982) təhsil alaraq, Nəsir Sadıqzadə və Vaqif Abbasov kimi sənətkarlardan sənətin sirlərini öyrənib. 

Şəki Teatrında (1982-1989) çalışıb. 1989-cu ildən etibarən Gənclər Teatrında aktyor kimi fəaliyyət göstərib. 2011-ci ildən Azərbaycan Dövlət Akademik Milli Dram Teatrında aktyor kimi çalışıb, müxtəlif səpkili rollar oynayıb.

Ayşad Məmmədov Akademik Milli Dram Teatrında işlədiyi müddətdə bir çox rollar oynayıb. Onun yaratdığı Romeo, Malkolm, Pek, Laert (V.Şekspir “Romeo və Cülyetta”, “Maqbet”, “Yay gecəsində yuxu”, “Hamlet”), Müsyö Jordan (M.F.Axundov “Müsyö Jordan və dərviş Məstəli şah”), Aydın (C.Cabbarlı “Aydın”), İsgəndər (C.Məmmədquluzadə “Ölülər”), Təlxək (M.F.Axudov “Ox və hədəf”), Kral (Q.Qorin “Aktyor və kral”), Padşah (Anar “Yaxşı padşahın nağılı”), Cəllad (“Generalın son əmri”, Vaqif Səmədoğlu) kimi obrazları aktyorun rəngarəng yaradıcılıq palitrasının nümunələrindəndir.

Azərbaycan tamaşaçıları onu daha çox “Bəxt üzüyü” filmində Hüseyn obrazından tanıyırlar. Hüseyn obrazı Ayşad Məmmədova böyük uğur qazandırıb və məhz bu obrazdan sonra o, kinorejissorların diqqətini cəlb edib ki, nəticədə də önəmli sənət nümunələrində yer alıb: “Ailə” (1998), “Güllələnmə təxirə salınır” (2002), “Moskva – Bakı qatarı” (2005), “Tilsim” (2005), “Yalan” (2006), “Məhkumlar” (2007), “Sirat körpüsü” (2007), “Günaydın, mələyim” (2008), “İstanbul reysi” (2010), “Sübhün səfiri” (2012),  “Əli və Nino” (2016) və b.

Aktyor eyni zamanda İran İslam Respublikasının istehsalı olan, rejissor Həsən Nəcəfinin quruluşunda 2007-ci ildə lentə alınan  “İtirilmiş pay” filmində də çəkilib.

Əməkdar artist Ayşad Məmmədov iki dəfə Prezident Mükafatına, Cəfər Cabbarlı mükafatına, Varnada keçirilən Beynəlxalq Monotamaşalar Festivalında “İuda” tamaşasındakı İuda roluna görə mükafata layiq görülüb.

Baxış sayı: 128