Ailə müqəddəsdir, ailə birlikdir, ailə mənəvi gücüdür. Ölkəmizin milli dəyərlər sistemində ailə anlayışı həmişə vacib yer tutub. Ailənin qorunub saxlanılması sağlam cəmiyyətin təməlini təşkil edir.

Birləşmiş Millətlər Təşkilatının Baş Assambleyasının “Beynəlxalq Ailə Günü”nün qeyd olunması barədə Qərarı ilə 1994-cü ildən etibarən 15 may dünyada “Beynəlxalq Ailə Günü” kimi qeyd olunur. Ölkəmizdə bu əlamətdar gün 2008-ci ildən qeyd edilir.

“Ailə xüsusi, mürəkkəb insan münasibətləri aləmidir. Burada böyük bir nəzakət, həssaslıq, şəxsiyyətin ləyaqətinə, ailənin mənafeyinə, hörmət və ehtiram lazımdır”, – deyən Ümummilli Lider Heydər Əliyevin ölkəyə rəhbərliyi dövründə ailə siyasətinin formalaşdırılması, ailələrin sosial problemlərinin həlli istiqamətində ardıcıl və məqsədyönlü tədbirlər həyata keçirilib. Ulu Öndərin əsasını qoyduğu ənənələr bu gün məqsədyönlü şəkildə davam etdirilir. Prezident cənab İlham Əliyev və ölkənin birinci xanımı Mehriban Əliyeva milli dəyərlərin qorunmasına xüsusi diqqət və qayğı göstərirlər.  Ailə dəyərlərinin qorunub saxlanılaraq gələcək nəsillərə ötürülməsi məqsədi ilə Ailə, Qadın və Uşaq Problemləri üzrə Dövlət Komitəsi tərəfindən hər il bu gün qeyd olunur.