Qurban Pirimov 1880-ci ilin oktyabrın 30-da Ağdamda anadan olub. O, ustadı Sadıqcandan tarda sərbəst ifa etməyi öyrənib, 15 yaşından Qarabağda tarzən kimi tanınmağa başlayıb.

Ömrünün düz 40 ilini Azərbaycan Opera və Balet Teatrına sərf edən Q.Pirimov milli opera sənətinin yaranmasında bilavasitə yaxından iştirak edib. 1908-ci il yanvar ayının 12-də Tağıyev teatrında oynanılan “Leyli və Məcnun” operasının ilk tamaşasında soloları tarzən Qurban Pirimov ifa edib.

1934–cü ildə səhnəyə qoyulan “Şahsənəm” operasının bəstəkarı Reynqold Qliyer öz əsərinin ən gözəl leytmotivlərini Q.Pirimovun “Arasbarı” və “Qarabağ şikəstəsi” çalğısından ilhamlanaraq yaradıb. Həmçinin Üzeyir Hacıbəyli özünün şah əsəri “Koroğlu”, Müslüm Maqomayev isə “Nərgiz” və “Şah İsmayıl” operalarında bir çox musiqi parçalarını tarzənin bənzərsiz ifasına uyğun bəstələyiblər.

 Qurban Pirimov “Əməkdar artist”, “Xalq artisti” fəxri adlarına layiq görülüb.

Sənətkar 1965-ci ildə vəfat edib.