Bu gün Xalq artisti, SSRİ və Azərbaycan Dövlət mükafatları laureatı, professor Nazim Rzayevin anadan olmasının 100 ili tamam olur.

Nazim Rzayev 1964-cü ildən (yarandığı gündən)1992-ci ilədək Qara Qarayev adına Dövlət Kamera orkestrinin bədii rəhbəri və baş dirijoru olub. O, rus və qərbi Avropa klassiklərinin əsərlərinin gözəl təfsirçisi idi, saysız-hesabsız simfonik və vokal əsərlərin kamera orkestri üçün işləmələri ona məxsus idi. 

Həyatının son illərində Türkiyənin Mersin Opera və balet teatrının baş dirijoru vəzifəsində çalışıb. Mersin teatrının yaradılmasında, orkestrin və opera truppasının formalaşmasında bilavasitə iştirak edib. N.Rzayevin rəhbərliyi ilə Ü.Hacıbəylinin “Arşın mal alan” operettasının, F.Əlizadənin “Boş beşik” baletinin, Motsartın “Bastyen və Bastyenna” operasının premyeraları böyük uğur qazanıb. Teatr tamaşaları ilə yanaşı N.Rzayev klassiklərin, türk və müasir bəstəkarların simfonik konsertlərinə dirijorluq edib. Daha sonra o, Əskişəhərdə Anadolu Universitetinin Konservatoriyasında skripka sinfi üzrə professor kimi fəaliyyət göstərib və orada ölkənin ən yaxşı gənc orkestri adını qazanmış tələbələrdən ibarət “Anadolu ulduzları” kamera orkestrini yaradıb.

Nazim Rzayev 2006-cı ildə vəfat edib.