XƏBƏRLƏR
MƏLUMAT
Bakıdakı Rus evində Cahid Cavadovun sərgisi açılıb
ÜMÜMİ XƏBƏRLƏR
08/02/2024 09:45

Bakıdakı Rus evində Azərbaycan Gəncləri Gününün qeyd olunması çərçivəsində istedadlı gənc rəssam, Azərbaycan Rəssamlar İttifaqının nəzdində Gənclər Birliyinin üzvü, Azərbaycan Zərgərlər Assosiasiyasının üzvü, “Çaharşah” Yaradıcılıq Mərkəzinin rəhbəri Cahid Cavadovun fərdi sərgisinin açılışı olub.

Rusiya İnformasiya-Mədəniyyət Mərkəzindən (RİMM) AZƏRTAC-a bildirilib ki, tədbir Üzeyir Hacıbəyli adına Bakı Musiqi Akademiyası (BMA) və Bakıdakı Rus evi ilə birgə təşkil olunub.

Bayram axşamının əvvəlində Bakıdakı Rus evinin rəhbərinin müavini Dmitri Yeqorov, Azərbaycanın Əməkdar rəssamı Məmmədhüseyn Hüseynov, tədbirin aparıcısı və kuratoru, sənətşünaslıq üzrə fəlsəfə doktoru, BMA-nın baş müəllimi Alyona İnyakina, eləcə də rəsm əsərlərinin müəllifi Cahid Cavadov özü auditoriya qarşısında çıxış ediblər.

Tədbirin təntənəli hissəsindən sonra tamaşaçılara Alyona İnyakina və BMA-nın tələbələri İdayət Sadıxbəyli, Kamil Hüseynzadə və Rəvan Əhmədzadənin iştirakı ilə musiqi proqramı təqdim olunub.

Sərgidə Cavadovun müxtəlif texnikada işlənmiş və müəllifin istedadının fərqli cəhətlərini əks etdirən 23 rəsm əsəri təqdim olunub. Azərbaycan Dövlət Rəssamlıq Akademiyasının məzunu Cahid Cavadovun əsərləri Almaniya, İtaliya, Türkiyə, Belarus və Gürcüstan kimi ölkələrdə nüfuzlu beynəlxalq platformalarda nümayiş etdirilib. O, bir sıra mükafatlara layiq görülüb, həmçinin 2017-ci ildə Bakıda keçirilmiş İslam Oyunlarında kostyum dizayneri olub.

Sərgi fevralın 15-dək davam edəcək.

Baxış sayı: 130