XƏBƏRLƏR
MƏLUMAT
Bakıdakı Rus evində “Abşerona bahar gəlir” adlı yaradıcılıq gecəsi keçirilib
ÜMÜMİ XƏBƏRLƏR
17/05/2024 14:16

Bakıdakı Rus evində mayın 16-da “Abşerona bahar gəlir” adlı ədəbi-musiqili gecə keçirilib. Tədbir Bakıdakı Rus evi tərəfindən təşkil olunub.

AZƏRTAC xəbər verir ki, gecənin proqramında ədəbi və musiqili nömrələr – klassik və populyar musiqi əsərləri, romanslar, şeirlər və hekayələr təqdim olunub.

Tədbirdə Azərbaycan Dövlət Akademik Musiqili Teatrının artistləri Firuz Məmmədov və Əliməmməd Novruzov, Azərbaycanın Əməkdar artisti İnarə Babayeva, Azərbaycanın Əməkdar artisti Zülfiyyə Sadıxova, pianoçu Cəvahir Zərbəliyeva, bard Georgi Çernoqorov, Bakıdakı Rus evində mədəni proqramların kuratoru Vəfa Məmmədova, tanqo ifaçısı Aleksey Ampilov, yazıçı və dramaturq Anara Axundova iştirak ediblər.

Konsertdən sonra AZƏRTAC-ın həmsöhbəti tədbirdə şeirlərlə çıxış edən Nathalie olub. O, həm də gecənin konsert proqramının tərtibatçısı idi. “Bu tədbirin proqramını tərtib etməyimə məni sevgi ruhlandırdı. Çünki opera, bard və poeziya məktəblərimizin belə güclü simalarının iştirakı ilə möhtəşəm tədbirə yalnız sevgi ruhlandıra bilər!”.

Bakıdakı Rus evinin mədəni proqramlar kuratoru Vəfa Məmmədova keçirilən tədbiri belə şərh edib: “Gecə çox uğurlu keçdi! Bakıdakı Rus evi dostlarımızı salamlamağa həmişə şaddır, əməkdaşlığa açıqdır”.

Azərbaycan Dövlət Akademik Musiqili Teatrının artisti Firuz Məmmədov də öz təəssüratlarını bölüşərək deyib: “Bugünkü konsert məndə böyük təəssürat yaratdı. Bu, çox gözəl konsert idi! Teatrdan olan həmkarlarım bu səhnədə çıxış edirdilər. İnarə Babayeva ilə bir vaxtlar musiqili komediya teatrında və opera teatrında oxumuşuq. O, bu gün xüsusi olaraq konsertdən sonra gəlib ki, mənimlə bərabər “Silva” operettasından duet ifa etsin. Georgi Çernoqorov da gözəl çıxış etdi. Hər kəsə çox təşəkkürlər!”.

Baxış sayı: 149