Dekabrın 3-də Azərbaycan Milli Xalça Muzeyində “Resurslar və mədəniyyət. Arxeologiyadan yeni texnologiyaya” adlı beynəlxalq konfrans keçirilib.

AZƏRTAC xəbər verir ki, “Birlik irsi. Gələcək üçün ənənələr” çoxillik kompleks proqramı çərçivəsində keçirilən konfrans Ümumrusiya Dekorativ Sənəti Muzeyi və Azərbaycan Milli Xalça Muzeyinin birgə təşkilatçılığı, Azərbaycan Respublikası Mədəniyyət Nazirliyi və MDB ölkələrinin Dövlətlərarası Humanitar Əməkdaşlığı Fondunun dəstəyi ilə baş tutub.

Əvvəlcə tədbir iştirakçıları Milli Xalça Muzeyi ilə yaxından tanış olublar.

Açılış nitqi ilə çıxış edən Azərbaycan Milli Xalça Muzeyinin direktoru Əminə Məlikova və Ümumrusiya Dekorativ Sənəti Muzeyinin direktoru Yelena Titova beynəlxalq konfransın işinə uğurlar arzulayıblar. Bildirilib ki, dekabrın 5-dək davam edəcək konfrans günlərində mövzuya uyğun məruzələr dinləniləcək. Beynəlxalq tədbirdə Azərbaycan, Belarus, Rusiya, Qazaxıstan, Qırğızıstan, Özbəkistan və Tacikistandan muzey direktorları və mütəxəssislər iştirak edirlər. Konfrans iştirakçıları təbii resursların müxtəlif xalqlar tərəfindən öyrənilməsi yollarını, bu prosesin xalq yaradıcılığı və peşəkar sənətkarlıqda, müasir rəssamların işlərində əksini, MDB ölkələri muzeylərinin biznes strukturlarının nümayəndələri və gənc kadrlarla işbirliyini müzakirə edəcəklər. Burada, həmçinin muzey idarəçiliyi və rəqəmsallaşdırma sahəsində tətbiq olunan yeniliklər təqdim olunacaq.

Sonra hər iki muzeyin direktorları bir-birinə xatirə hədiyyəsi bağışlayıblar.

Konfrans “MDB məkanında muzeylərarası əməkdaşlıq” mövzusunda akademik sessiya ilə işini davam etdirib. Burada “Birlik irsi. Gələcək üçün ənənələr” planşet sərgisi təqdim olunub. Qarşıdakı günlərdə davam edəcək akademik sessiyalarda “Muzey və insanlar”, “Muzey və informasiya resursları”, “Təbiət və ənənələr ilham mənbəyi kimi”, “Avrasiya mədəniyyətlərinin ən qədim əsasları: arxetiplər, simvolizm, arxeoloji artefaktlar”, “MDB xalqlarının dekorativ sənəti”, “Müasir muzeyin ənənələrin qorunmasında rolu” kimi mövzularda məruzələr dinləniləcək.

Konfrans çərçivəsində mədəni proqram da təşkil olunacaq.