Bakı Şəhər Mədəniyyət Baş İdarəsinin tabeliyində olan Bakı Uşaq və Gənclər Teatrı “Addım-addım Vətəndə” layihəsi çərçivəsində Azərbaycanın müxtəlif bölgələrində fəaliyyət göstərən teatr kollektivləri ilə əməkdaşlıq etməklə, “açıq qapı” prinsipi ilə tamaşa və tədbirlər keçirir.

Zəfər Gününə həsr olunmuş layihənin üçüncü səfəri noyabrın 7-də Füzuli Dövlət Dram Teatrı ilə birgə Horadiz şəhərində həyata keçirilib.

Öncə Azərbaycan Respublikasịnın Dövlət Himni səsləndirilib, şəhidlərimizin ruhu bir dəqiqəlik sükutla yad edilib.

Daha sonra aparıcılar cıxış edərək, hər iki teatrın yaranma tarixi, repertuarı, iştirak etdiyi beynəlxalq və daxili festivallar haqqında məlumat veriblər.

Teatrların rəhbərləri Əməkdar artist, rejissor, aktyor İntiqam Soltan və Azər Abbasov çıxışlarında layihə haqqında danışıblar.

Proqramda Füzuli Dövlət Dram Teatrının aktyorları İntizar Quliyeva və Zamin Quliyevin ifasında Qarabağa həsr olunmuş kompozisiya nümayiş olunub. Kompozisiyanın rejissoru FDDT-nın baş rejissoru, prezident mükafatçısı Mirzə Nicatdır.

Daha sonra Bakı Uşaq və Gənclər Teatrının repertuarında xüsusi yer tutan “Vətən” tamaşası aktyorlar – Niyaz İlyasoğlu, Rauf Hüseynli, Qurban Əhmədovun ifasında nümayiş olunub. Tamaşanın rejissoru Əməkdar artist İntiqam Soltandır.

Tədbirin sonunda Bakı Uşaq və Gənclər Teatrı tərəfindən Füzuli Dövlət Dram Teatrına təşəkkürnamə təqdim edilib.Həmçinin Füzuli Dövlət Dram Teatrı Bakı Uşaq və Gənclər Teatrına Fəxri Fərman təqdim edib.

Qeyd edək ki, layihə bundan əvvəl Lənkəranda-Lənkəran Dövlət Dram Teatrı ilə, Qusarda-Qusar Dövlət Ləzgi Dram Teatrı ilə birgə həyata keçirilib.

Layihəyə teatr ilinin sonunda Bakı şəhərində bölgə teatrlarının iştirakı ilə festivalla yekun vurulması planlaşdırılıb.