XƏBƏRLƏR
MƏLUMAT
Bakı Uşaq və Gənclər Teatrı Beynəlxalq Teatr Gününü təbrik edir
ÜMÜMİ XƏBƏRLƏR
27/03/2021 06:01

Hər zaman orijinal təqdimatları ilə seçilən Bakı Şəhər Mədəniyyət Baş İdarəsinin Bakı Uşaq və Gənclər Teatrı bu dəfə həmkarlarını və teatrsevərləri Beynəlxalq Teatr Günü münasibətilə səhnədən təbrik edib.

Bir ildən artıqdır ki, teatrlarımız tamaşaçı üzünə, teatrsevərlər isə teatr adlı möhtəşəm sənət məbədinə həsrət qalıb. Pandemiya başlanandan onlayn tamaşalar getsə də, onlar nə səhnədə can qoyan aktyorun hiss və həyəcanını, nə də emosional yükün təsiri altında bəzən gülən, bəzən kövrələn, bəzən də gözlərində sevinc qığılcımı parlayan tamaşaçı baxışlarını əvəz etmir.

Ruhların dinləndiyi, düşüncələrin arındığı Teatr adlı məbəddə səhnə və zal arasında yaranan iltifatı və mənəvi bağları heç nə əvəz edə bilməz.

2021-ci ildə Milli Teatr Gününü də, Beynəlxalq Teatr Gününü də teatrsız və tamaşaçısız qeyd etdik. Ancaq ümidimizi üzmür və “çətin günün ömrü az olur” – deyərək bütün teatr xadimlərimizi və teatrsevərləri tükənməyən tamaşaçı məhəbbəti ilə Beynəlxalq Teatr Günü münasibətilə təbrik edir, onlara cansağlığı və yeni-yeni yaradıcılıq uğurları arzulayırıq.

https://www.youtube.com/watch?v=5BG7j60YRIY 

Baxış sayı: 497