XƏBƏRLƏR
MƏLUMAT
Bakı Uşaq Teatrı I Lənkəran Beynəlxalq Teatr Festivalında çıxış edib
ÜMÜMİ XƏBƏRLƏR
04/06/2019 10:36

1-5 iyun tarixlərində  I Lənkəran Beynəlxalq Teatr Festivalı keçirilir. Mədəniyyət Nazirliyinin, Lənkəran Şəhər İcra Hakimiyyətinin və Azərbaycan Teatr Xadimləri İttifaqının birgə təşkilatçılığı ilə keçirilən bu sənət bayramı, ölkə Prezidentinin sərəncamı ilə təsdiq edilmiş “Azərbaycan teatrı 2009-2019-cu illərdə” Dövlət Proqramı çərçivəsində Lənkəran Dövlət Dram Teatrında baş tutur.

Festivala ölkəmizin 10 sənət ocağı – Azərbaycan Dövlət Akademik Milli Dram Teatrı, Azərbaycan Dövlət Gənc Tamaşaçılar Teatrı, Azərbaycan Dövlət Kukla Teatrı, Şuşa Dövlət Musiqili Dram Teatrı, Gəncə Dövlət KuklaTeatrı, Lənkəran Dövlət Dram Teatrı, Bakı Uşaq Teatrı, Qax Dövlət Kukla Teatrı, Şəki Dövlət Dram Teatrı, Salyan Dövlət Kukla Teatrı və Ol Teatrı öz tamaşaları ilə qatılır. Festivalda həmçinin Böyük Britaniyanın “Two Destination” Teatrı, Gürcüstanın “Azadlıq Teatrı” , İranın “Muğan Hünər” və “Mika” Teatrları, habelə “Ünvan” Ərdəbil şəhər teatrının kollektivləri iştirak edir.

Bakı Şəhər Mədəniyyət Baş İdarəsinin Bakı Uşaq Teatrı da bu festivalda “Göyçək Fatma” tamaşası ilə çıxış edib. Milli folklorumuzun gözəl nümunəsi olan “Göyçək Fatma” nağılı əsasında hazırlanmış eyniadlı tamaşada balalarımıza ədalətli olmaq kimi gözəl duyğular aşılanır. Xeyirxah, göyçək Fatma qarşısına çıxan hər cür çətinlikləri təmkinlə aradan qaldırıb öz istəyinə nail olur. Azərbaycan xalq nağılı əsasında səhnələşdirilmiş tamaşa 7-13 yaşlı uşaqlar üçün nəzərdə tutulub. 

Qeydedək ki, tamaşanın rejissoru - İntiqam Soltan, rejissor assistenti - İlhamə Əhmədova rəssam - Sevda Məmmədova, qrim rəssamı- Zəminə Allahverdiyeva, musiqi tərtibatı - Rauf Hüseynlidir.  Rollarda: Türkan Şahmarlı, Niyaz İlyasoğlu, Sovqat Səmədova, Könül Şahbazova, Niyaz Novruzov, Nicat Əhmədov, Gülər Ləzgiyeva, Qurban Əhmədov, Emin Balayev çıxış ediblər.

 

Baxış sayı: 34642