Berlində “Şarlottenburq İncəsənət Həftəsonu” (Art Weekend Charlottenburg) çərçivəsində alman və Azərbaycan rəssam və heykəltaraşlarının sərgisi təşkil olunub.

AZƏRTAC xəbər verir ki, sərgidə tanınmış azərbaycanlı rəssamlar Əli Şəmsinin və Günay Şəmsinin əsərləri də nümayiş etdirilir. Alman rəssam və heykəltaraşlardan isə Fred Tiqer, Salomea Diamant, Qabriela Vüsten-Liedervald, Gianni Tanda, Kristof Bartolomeo və Fabian Vertin əsərləri sərgilənir.

Ümumilikdə 40-dan çox əsərin yer aldığı sərgidə Əli Şəmsinin 5, Günay Şəmsinin isə 20-dək əsəri nümayiş etdirilir. Əli Şəmsinin doğma Qarabağımızın füsunkar mənzərəsini əks etdirən tablosu ziyarətçilər tərəfindən böyük maraqla qarşılanıb.

Günay Şəmsi isə sərgidə Azərbaycan və Almaniya arasında mədəni əlaqələri əks etdirən rəsm əsərləri ilə çıxış edir. Sərgidə gənc rəssamın incəsənətsevərlər tərəfindən böyük maraqla qarşılanan “Füzuli”, “Adəm və Həvva” və digər əsərləri nümayiş olunur.

Rəssam Günay Şəmsi AZƏRTAC-a müsahibəsində sərgidə nümayiş olunan əsərləri barədə məlumat verərək deyib: “Bu gün Berlində keçirilən “Şarlottenburq İncəsənət Həftəsonu” adlı sərgidə tanınmış alman və azərbaycanlı rəssamların və heykəltəraşların əsərləri nümayiş olunur. Sərgidə məşhur azərbaycanlı rəssam Əli Şəmsinin Qarabağa həsr olunmuş mənzərələrini görmək mümkündür. Bundan əlavə, sərgidə mən də öz əsərlərimi – ölkəmizə, Azərbaycan və Almaniya arasındakı mədəni dialoqa həsr etdiyim rəsmləri təqdim etmişəm”.

Günay Şəmsi, sərginin vacib əsərlərindən birinin Füzulinin portreti olduğunu vurğulayıb. O, azərbaycanlı olaraq Almaniyada mədəniyyətimizi təmsil etməkdən və ölkəmizin yüksək qonaqpərvərliyini öz əsərləri vasitəsilə çatdırmaqdan böyük qürur hissi keçirdiyini qeyd edib.

Elvin Mövsüm

AZƏRTAC-ın xüsusi müxbiri

Berlin