XƏBƏRLƏR
MƏLUMAT
Azərbaycanlı rəssam Başkortostanda etnik-bədii simpoziumda iştirak edəcək
ÜMÜMİ XƏBƏRLƏR
24/06/2024 14:23

“Arts Council Azerbaijan” qeyri-hökumət təşkilatının nümayəndəsi Eldar Babazadə “Tura-xan” etnik-bədii simpoziumunda iştirak etmək üçün dəvət alıb. İyulun 18-28-də Rusiya Federasiyasının Başkortostan Respublikasında keçiriləcək tədbir ənənəvi təsviri sənət növlərinin aktuallaşdırılması və Avrasiya Köçəri Sivilizasiyalar Muzeyinin yaradılması mövzularına həsr olunub.

AZƏRTAC xəbər verir ki, “Tura-xan” etnik-bədii simpoziumu Rusiya Federasiyası Başkortostan Respublikasının Mədəniyyət Nazirliyi, Mədəni İrsin Daşınmaz Əmlak Obyektlərinin Mühafizəsi və İstifadəsi üzrə Elmi-İstehsalat Mərkəzi və “Şulqan-Taş mağarası” Tarix-Mədəniyyət Muzey-Qoruğunun dəstəyi ilə “Avrasiya Köçəri Sivilizasiyalar Muzeyi” qeyri-kommersiya təşkilatı tərəfindən təşkil olunur.

Yaradıcılığında etnik və folklor mövzularına toxunan peşəkar rəssamlar üçün maraqlı olacaq bu simpozium mühüm cazibə mərkəzləri olan Tura-xan məqbərəsində və Şulgan-Taş mağarasında keçiriləcək. Avrasiyanın coğrafi mərkəzi olan Başkortostan regionun zəngin mədəni irsini və adət-ənənələrini nümayiş etdirərək, həmçinin dünyanın hər yerindən iştirakçıları qəbul etməyə hazırdır.

Eldar Babazadə simpozium çərçivəsində xalq adət-ənənələri mövzusunda öz eskizlərini təqdim edəcək. Rəssamın iştirakı xalqlar arasında mədəni dialoqun inkişafına və Azərbaycan incəsənətinin beynəlxalq aləmdə populyarlaşmasına töhfə olacaq.

“Tura-xan” etnik-bədii simpoziumu Avrasiyanın köçəri xalqlarının incəsənətini və mədəni irsini təbliğ etmək məqsədi daşıyan illik tədbirdir.

“Arts Council Azerbaijan” Azərbaycanın müasir və ənənəvi incəsənətinin beynəlxalq arenada dəstəklənməsi, onun təbliği ilə məşğul olan aparıcı təşkilatdır.

 

Baxış sayı: 95