Azərbaycanlı pianoçu Rauf Qasımov Şimali Kiprin 22-ci Beynəlxalq Musiqi Festivalı çərçivəsində konsert proqramı ilə çıxış edəcək.

AZƏRTAC xəbər verir ki, tədbirin keçirilmə tarixi – oktyabrın 12-si musiqiçinin 70 illik yubileyinə təsadüf edir.

Azərbaycanlı pianoçu Motsart, Şopen, Prokofyev, Vaqif Mustafazadə və başqa bəstəkarların əsərlərini ifa edəcək.

Şimali Kiprdə 22-ci Beynəlxalq Musiqi Festivalı bazar ertəsi, oktyabrın 7-də əhalinin sıx məskunlaşdığı Girne limanından üç kilometr aralıda yerləşən “Bellapais Abbey” tarixi monastırının ərazisində başlayır.

Uzun illərdir Şimali Kipr Türk Cümhuriyyətində yaşayan pianoçu tədbir ərəfəsində konsert proqramına öz həyatının mərhələlərini əks etdirən əsərlər daxil etmək qərarına gəldiyini bildirib.

Rauf Qasımov təkcə konsertlərlə çıxış etmir, həm də Şimali Kiprdə musiqi istedadlarının yetişdirilməsində fəal iştirakı ilə fərqlənir. Onun məktəbində təhsil alan Şimali Kiprin onlarla gənc pianoçusu bu gün dünyanın müxtəlif ölkələrinin konservatoriyalarında təhsillərini uğurla davam etdirirlər.

Ramin Abdullayev

AZƏRTAC-ın xüsusi müxbiri

Ankara