Nyu-York şəhərindəki “Karneqi-holl” zalının səhnəsində Milli Musiqi və Qlobal Mədəniyyət Cəmiyyətinin təsisçisi, Azərbaycanın Əməkdar artisti, professor, tanınmış pianoçu Nərgiz Əliyarovanın konserti olub.

AZƏRTAC xəbər verir ki, dünyaşöhrətli bəstəkar, Xalq artisti, Dövlət mükafatı laureatı, akademik Arif Məlikovun 90 illiyinə həsr olunmuş musiqi axşamı anşlaqla keçib.

Nərgiz Əliyarova Arif Məlikovun “Məhəbbət əfsanəsi” baletindən fortepiano üçün pyesi ifa edib. Baletin süjet xətti və bu əsərin Arif Məlikovun yaradıcılığında mərkəzi rolunu qeyd edən pianoçu vurğulayıb ki, bu əsər dünyanın onlarla ölkəsində səhnəyə qoyulub və musiqi sənəti xəzinəsinə daxil edilib. Proqramda, həmçinin Bethoven, Şopen, Debüssi və Metnerin əsərləri səsləndirilib.

Tamaşaçılar musiqiçinin ifasını maraqla qarşılayıblar. Nərgiz Əliyarova, həmçinin alqışlar altında təkrarən Şopenin valsını ifa edib. Konsert musiqi həvəskarlarının sürəkli alqışları ilə başa çatıb.

Nərgiz Əliyarova Nyu-Yorkda yaşayan dünyaşöhrətli azərbaycanlı pianoçu və klassik musiqişünasdır. O, doqquz yaşında verdiyi ilk konsertindən bəri dünyanın 40-dan çox şəhərində solist qismində, kamera və simfonik orkestrlərlə çıxış edib. N.Əliyarova Azərbaycan Respublikasının Əməkdar artistidir və 2010-cu ildə Polşa hökuməti tərəfindən “Şopen irsinə verdiyi görkəmli töhfəyə görə” mükafatına layiq görülüb. Nərgiz xanım 25 il Bakı Musiqi Akademiyasında professor kimi dərs deyib. O, bu müddət ərzində fəlsəfə doktoru elmi dərəcəsi alıb və 20-dən çox elmi məqalənin, eləcə də bir neçə kitabın müəllifidir. Pianoçu, həmçinin Milli Musiqi və Qlobal Mədəniyyət Cəmiyyətinin təsisçisidir.