Aprelin 11-də Roma şəhərində yerləşən tarixi Palazzo Brancaccio sarayında “Azərbaycan Milli Geyimlərinin Sehrli Dünyası” adlı mədəni tədbir keçirilib.

Tədbir Azərbaycanın İtaliyadakı Səfirliyi, İtaliyadakı Azərbaycan Mədəniyyət Mərkəzi və Bakı Milli Geyim Evinin birgə təşkilatçılığı ilə baş tutub.

Tədbirin əsas məqsədi Azərbaycan milli geyim irsinin zənginliyini beynəlxalq ictimaiyyətə təqdim etmək, mədəni dəyərlərin təbliği və Azərbaycan–İtaliya mədəni əlaqələrinin inkişafına töhfə vermək olub.

Tədbirin açılış hissəsində çıxış edən təşkilatçılar Azərbaycan milli geyimlərinin tarixi kökləri, regional xüsusiyyətləri və bədii-estetik çalarları haqqında məlumat veriblər. Bildirilib ki, milli geyimlər xalqımızın həyat tərzini, zövqünü və sosial kimliyini əks etdirən mühüm mədəni yaddaş nümunələridir.

Moda nümayişi zamanı Bakı Milli Geyim Evinin kolleksiyasından Azərbaycanın müxtəlif bölgələrinə məxsus qadın və kişi milli geyim nümunələri təqdim olunub. Zərif naxışlar, əl işləri və orijinal detallarla bəzədilmiş libaslar tamaşaçılar tərəfindən böyük maraqla qarşılanıb.

Tədbirin bədii hissəsində Dövlət Rəqs Ansamblının rəqqasları səhnəyə çıxaraq milli geyimlərdə Azərbaycan xalq rəqslərini ifa ediblər. Bu çıxışlar tamaşaçılara xalqımızın zəngin rəqs mədəniyyəti və geyim estetikası haqqında əyani təsəvvür yaradıb.

Gecəyə İtaliyanın diplomatik korpusun üzvləri, İtaliyanın incəsənət və moda sahəsinin nümayəndələri, ictimai xadimlər və mədəniyyətsevərlər qatılmışdırlar.