TÜRKSOY Beynəlxalq Türk Mədəniyyəti Təşkilatının və  Ankaranın Keçiören rayon bələdiyyəsinin birgə təşkilatçılığı ilə “Beynəlxalq Keçiören Türk dünyası şöleni” adlı festival keçirilib

Ankaradakı Lavanta və Gül Baxçası parkında reallaşan açılış tədbirində ölkəmizi Azərbaycan Respublikasının Türkiyə Respublikasındakı Səfirliyinin tabeliyində Mədəniyyət Mərkəzinin direktoru Samir Abbasov və Bakı Şəhər Mədəniyyət Baş İdarəsinin rəisi İbrahim Əliyev təmsil edib.

Tədbir çərçivəsində türk dövlətlərinin mədəniyyətinə həsr olunmuş böyük konsert proqramı təşkil  olunub. Tədbirdə Azərbaycandan gələn incəsənət ustaları, "Səma" Rəqs Ansamblı milli rəqs və mahnılarımızı təqdim ediblər.

Konsert proqramında ölkəmizlə yanaşı Qazaxıstan, Özbəkistan, Qırğızıstan, Rusiya Federasiyasının Kabardin-Balkar Respublikasının musiqi və rəqs kollektivlərinin çıxışları da maraqla qarşılanıb.

Daha sonra kollektivlər Beynəlxalq Karaman Türk Dünyası Festivalına qatılıblar. Niğde və Karaman şəhərlərində təşkil olunmuş “Vətən eşqi” paradı, TÜRKSOY ölkələrinin mədəniyyətini əks etdirən geniş sərgi, şoular və tanınmış sənətçilərin konsertləri keçirilib. Konsertlər zamanı TÜRKSOY ölkələrindən gələn rəqs qruplarının təqdimatı bu şəhərlərdə coşqu ilə qarşılanıb.

Festivallara qatılan kollektivlərə təşkilatçılar tərəfindən xüsusi mükafatlar təqdim edilib.