Aprelin 21-də Türkiyə-Azərbaycan Dostluq, Əməkdaşlıq və Həmrəylik Fondunun (TADİV) rəhbəri, professor, tanınmış alim Aygün Attar IV Beynəlxalq Hadi Poyrazoğlu Kukla və Qaragöz Festivalı çərçivəsində Türkiyədə səfərdə olan Azərbaycan Dövlət Kukla Teatrının təmsilçiləri ilə görüşüb.

Bu barədə AZƏRTAC-a teatrın mətbuat xidmətində məlumat verilib.

Bildirilib ki, Fondun binasında baş tutan görüşdə çıxış edən teatrın direktoru, Azərbaycanın Əməkdar mədəniyyət işçisi Rəşad Əhmədzadə qəbul və xoş münasibət üçün kollektiv adından Aygün xanıma dərin təşəkkürünü çatdırıb. Vurğulayıb ki, Türk dünyasının tanınmış alimi, ictimai-siyasi xadimi, professoru, ləyaqətli Vətən qızı, Azərbaycanın Türkiyədəki qüruru Aygün Attar nümunəvi həyat yolu və dolğun fəaliyyəti ilə bir çoxlarımız üçün örnəkdir. Daha sonra onun çoxşaxəli fəaliyyətində maddi-mənəvi dəyərlərin təbliği işinin mütəşəkkil təşkilinin də daim ön planda olduğuna diqqət çəkib. Qeyd edib ki, bu mənada mədəniyyət sahəsi və sənət adamlarına xüsusi sevgi, həssaslıqla yanaşır.

Öz növbəsində bu görüşdən məmnun olduğunu deyən A. Attar milli mədəniyyətimiz, onun əsas qollarından olan teatrımızın təşəkkülü üçün ölkə sərhədlərindən kənarlarda daha geniş müstəvidə təbliğini vacib sayıb. Bu mənada festival və sənət mübadiləsi xarakterli bu kimi tədbirlərin intensivliyinə diqqət çəkib, festivalın işinə uğurlar arzulayıb.

Bir əsrə yaxın zəngin və dolğun tarixi yol keçən, fəaliyyətini Vətən balalarının maariflənməsi və yüksək sənət zövqündə yetişməsi yönündə quran Azərbaycan Dövlət Kukla Teatrı təmsilçilərinə bu şərəfli yolda uğurlar arzulayıb.

Qeyd edək ki, IV Beynəlxalq Hadi Poyrazoğlu Kukla və Qaragöz Festivalı aprelin 21-dən mayın 12-dək davam edəcək beynəlxalq sənət bayramı Türkiyənin iki böyük şəhərində – Ankarada (23–25 aprel) və İstanbulda (26–27 aprel) keçiriləcək. Festival daha sonra Bakıda (28–30 aprel) və Özbəkistanda (2–4 may) davam edəcək. Bağlanış mərasimi isə mayın 9-dan 12-dək Şimali Kipr Türk Respublikasında baş tutacaq.

Azərbaycan Dövlət Kukla Teatrının 10 nəfərlik heyəti aprelin 21-dən 26-dək Türkiyədə səfərdə olacaq. Səfər çərçivəsində tamaşaçılara “Cırtdanın Türkiyə macəraları” adlı tamaşa-konsert təqdim olunacaq. Səhnə əsərinin quruluşçu rejissoru və səhnələşdirmə müəllifi Saida Haqverdiyeva, tərtibatçı rəssamı isə İqbal Əliyevdir.

Milli musiqi və rəqslərlə zəngin səhnə işində obrazları tamaşada aparıcı kukla aktyorları – Səriyyə Mansurova, Aygül Ağayeva, Elnur Abbasquliyev, Rəhim Rəhimov və Cavid Telman canlandıracaqlar.