Aprelin 23-də Bakı Şəhər Mədəniyyət Baş İdarəsinin tabeliyində olan Qaradağ rayon Heydər Əliyev Mərkəzinin və YAP Qaradağ Rayon təşkilatının birgə təşkilatçılığı ilə “Konstitusiya və Suverenlik İli” çərçivəsində  “Azərbaycan Konstitusiyası və Suverenlik İlinin əhəmiyyəti” mövzusunda dəyirmi masa keçirilib.

Tədbirdə rəsmilər, şəhid anaları, mədəniyyət işçiləri, rayon müəssisələrinin əməkdaşları iştirak ediblər.

Əvvəlcə Azərbaycan Respublikasının Dövlət Himni səsləndirilib, Ümummilli Lider Heydər Əliyevin əziz xatirəsi bir dəqiqəlik sükutla yad edilib.

Çıxış edənlər qeyd ediblər ki, Azərbaycanın müstəqil dövlət kimi mövcudluğunun qorunub saxlanılması, inkişafı, ölkəmizdə sabitlik və həmrəyliyin təmin olunması bilavasitə Ulu Öndər Heydər Əliyevin adı ilə bağlıdır. Konstitusiyamız 1995-ci il 12 noyabr tarixində ümumxalq səsverməsi yolu ilə qəbul edilib. Bu gün  ölkəmizin ərazi bütövlüyü və suverenliyi tam bərpa edilib, Azərbaycan Konstitusiyasının hüquqi qüvvəsi işğalın aradan qaldırıldığı bütün ərazilərdə bərqərar olub."Suverenlik və Konstitusiya İli" təkcə keçmişə hörmət deyil, həm də gələcəyə möhkəm addımlarla irəliləmək üçün strateji çağırışdır.

Tədbir iştirakçıları "Konstitusiya və Suverenlik İli" ilə əlaqədar mərkəzin foyesində açılmış kitab sərgisi ilə tanış olublar.

Sonda mövzu ilə bağlı videoçarx nümayiş etdirilib.