Azərbaycanlı rəssam Rövşən Nur “World Art Dubai 2025” nüfuzlu beynəlxalq sərgidə milli incəsənətimizi təmsil edir.

AZƏRTAC xəbər verir ki, 17–20 aprel tarixlərində Dubayda keçirilən “World Art Dubai 2025” Yaxın Şərqin ən iri beynəlxalq incəsənət sərgilərindən biridir. Bu tədbir hər il ABŞ, Böyük Britaniya, Fransa, Çin, Yaponiya, İtaliya, Hindistan və digər ölkələr də daxil olmaqla, onlarla ölkədən mindən çox rəssamı bir araya gətirir.

Rövşən Nur sərgidə Azərbaycan mədəniyyətini dərin, poetik və çoxqatlı formada təqdim edir. Onun yaradıcılığı köklərlə, tarixlə, xalqın ruhu ilə aparılan bir dialoqdur. Rəssam milli ənənəvi motivləri müasir bədii ifadə vasitələri ilə incə şəkildə birləşdirərək, müxtəlif mədəniyyətlərdən olan izləyicilərə tanış və yaxın gələn obrazlar yaradır.

“Mən Azərbaycanı nuru və səsi ilə təmsil edirəm. Mənim sənətim dünyamıza, daha dəqiq desək, onun rənglərinə, simvollarına, melodiyalarına və daxili səssizliyinə bir baxış dəvətidir. Sənət universal bir dildir və bu dildə ölkəm adına danışa bildiyim üçün xoşbəxtəm”, – deyə rəssam bildirib.

“Belə genişmiqyaslı beynəlxalq tədbirin bir hissəsi olmaq mənim üçün böyük şərəfdir. Mən təkcə rəssam kimi özümü deyil, Azərbaycan mədəniyyətinin bütün dərinliyini və zənginliyini təmsil edirəm. Əsərlərim vasitəsilə xalqımın ruhunu, tarixini, rənglərini, duyğularını və qəlbin musiqisini dünyaya çatdırmağa çalışıram”, – deyə Rövşən Nur fikirlərini bölüşüb.

Azərbaycan rəssamının “World Art Dubai 2025”də iştirakı Azərbaycan Respublikasının Diasporla İş üzrə Dövlət Komitəsinin aktiv fəaliyyəti, mədəni təşəbbüsü və dəstəyi ilə mümkün olub. Komitə milli incəsənətin beynəlxalq arenada tanıdılması istiqamətində mühüm töhfələr verir.