Bakı Şəhər Mədəniyyət Baş İdarəsinin tabeliyində olan Mərdəkan Mədəniyyət Sarayının və Xəzər Rayon İcra Hakimiyyətinin birgə təşkilatçılığı ilə 2 Fevral-Azərbaycan Gəncləri Gününə həsr olunmuş tədbir keçirilib.

Tədbirdə rəsmilər, hüquq-mühafizə orqanlarının rəhbərləri, təhsil, səhiyyə, mədəniyyət müəssisələrinin nümayəndələri, Vətən müharibəsi iştirakçıları , və rayonun ictimai-siyasi, mədəni həyatında fəal iştirak edən gənclər iştirak ediblər.

İlk olaraq mədəniyyət sarayının foyesində təşkil olunmuş sərgiyə baxış keçirilib. Sərgidə gənc rəssamların müxtəlif mövzulara həsr olunmuş əl işləri sərgilənib.

Tədbir Azərbaycan Respublikasının Dövlət Himninin səsləndirilməsi və ölkəmizin ərazi bütövlüyü naminə canını qurban vermiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb.

Çıxış edənlər gəncləri bayram münasibətilə təbrik ediblər və onlara uğurlar arzulayıblar.

Daha sonra ölkəmizdə həyata keçirilən gənclər siyasətindən danışılıb. Bildirilib ki, Ümummilli Lider Heydər Əliyevin  əsasını qoyduğu siyasət bu gün də davam etdirilir. Prezident İlham Əliyevin rəhbərliyi ilə gənclərin fərdi inkişafına təkan verən dövlət proqramları həyata keçirilir. Azərbaycan gəncləri ölkə həyatının bütün sahələrində təmsil olunur və özlərini doğruldurlar. 44 günlük müharibədə də qələbəmizi təmin edən gənc nəsil ən yüksək vətənpərvərlik hisslərinə malikdir.

Tədbirdə rayonun ictimai-siyasi və mədəni həyatında fəallıq göstərərək, yüksək nailiyyətlər əldə edən bir qrup gənc Xəzər Rayon İcra Hakimiyyəti tərəfindən Təşəkkürnamə ilə təltif olunub.

Sonra tədbir konsert proqramı ilə davam edib. Konsertdə gənc, istedadlı müğənnilər çıxış edərək ifaları ilə gənclərimizi təbrik ediblər.