XƏBƏRLƏR
MƏLUMAT
Azərbaycan diasporunun üzvləri Çingiz Aytmatova həsr olunmuş tədbirdə iştirak ediblər
ÜMÜMİ XƏBƏRLƏR
11/12/2023 15:55

Moskvanın Azərbaycan diasporunun üzvləri qırğız yazıçısı Çingiz Aytmatovun anadan olmasının 95-ci ildönümünə həsr olunmuş tədbirdə iştirak ediblər.

AZƏRTAC xəbər verir ki, M.İ.Rudomino adına Ümumrusiya dövlət xarici ədəbiyyat kitabxanasında Çingiz Aytmatova həsr olunmuş “Çingiz Aytmatov. Şəxsiyyət. Zaman” adlı ədəbi-musiqili gecə keçirilib. Tədbirin təşkilatçıları Qırğız Respublikasının RF-dəki səfirliyi və Ç.Aytmatov adına İssık-Kul mədəni forumunun dəstəyi ilə Qırğızıstan diasporu şurasıdır.

Gecədə tanınmış alimlər, ictimai xadimlər, milli diaspor təşkilatlarının nümayəndələri çıxış ediblər.

Moskvanın Azərbaycan diasporunun rəhbəri Bəxtiyar Həsənov, diaspor təşkilatı sədrinin müavini Həşim Əliyev çıxışlarında vurğulayıblar ki, Çingiz Aytmatovun əsərləri Qırğızıstan və Rusiyadan sonra ən çox Azərbaycanda tərcümə edilib və nəşr olunub. Yazıçının yubileyləri ölkəmizdə də geniş və yüksək səviyyədə qeyd olunub. Bakıda Çingiz Aytmatovun yaradıcılığı barədə məcmuələr və monoqrafiyalar nəşr etdirilib.

Ümummilli Lider Heydər Əliyev Çingiz Aytmatovu yazıçı və şəxsiyyət kimi yüksək dəyərləndirirdi. Yazıçı öz həyat kredosunu “xalqın ölməzliyi onun dilindədir” sözləri ilə ifadə edirdi. Həşim Əliyev yubilyarın rus dilində və moskvalı şairə Afaq Şıxlının tərcüməsində Azərbaycan dilində şeirlərini səsləndirib.

Tədbir iştirakçıları görkəmli yazıçının əcnəbi dillərə tərcümə olunmuş əsərlərindən ibarət sərgi ilə də tanış olublar.

Fəridə Abdullayeva

AZƏRTAC-ın xüsusi müxbiri

Moskva

Baxış sayı: 119