XƏBƏRLƏR
MƏLUMAT
Azərbaycan Braziliyada Beynəlxalq Milli Mətbəx və Mədəniyyət sərgisində təmsil olunub
ÜMÜMİ XƏBƏRLƏR
04/06/2024 09:25

Bu il ölkəmiz ilk dəfə olaraq Braziliyanın paytaxtında keçirilən Beynəlxalq Milli Mətbəx və Mədəniyyət satış sərgisində təmsil olunub.

Bu barədə AZƏRTAC-a Azərbaycanın Braziliyadakı səfirliyindən məlumat verilib.

Bildirilib ki, Diplomatik missiya rəhbərlərinin həyat yoldaşları qrupu və Braziliyanın Federal Dairəsinin (paytaxt və ətraf əraziləri əhatə edir) icra hakimiyyəti tərəfindən ənənəvi olaraq hər il təşkil edilən bu sərgidə 70-dən artıq ölkə təmsil olunur, öz kulinariyası, mədəniyyət və sənətkarlıq nümunələrini təqdim edir. Paytaxt Braziliya şəhərinin İncəsənət Muzeyində keçirilən sərgini hər il minlərlə insan ziyarət edir.

Braziliyadakı səfirliyimizin təşkilatçılığı ilə ilk dəfə ölkəmiz Beynəlxalq Milli Mətbəx və Mədəniyyət satış sərgisində Azərbaycanda istehsal olunmuş qida məhsulları, çaylar, kosmetik vasitələr, eləcə də milli yeməklər və səfirliyin əməkdaşları tərəfindən xüsusi hazırlanmış suvenirləri təqdim edib. Həmçinin uşaqlar tərəfindən sərginin mədəniyyət proqramı çərçivəsində “Nəlbəki” rəqsi ifa olundu.

Azərbaycanın sərgidə iştirakı həm yerli əhali, həm də digər ölkələrin nümayəndəlikləri tərəfindən böyük maraqla qarşılanıb. Səhər saat 10:00-dan axşam saat 16.00-dək davam edən sərginin son anınadək qonaqlar ölkəmizin masasını ziyarət edib, Azərbaycan məhsulları ilə maraqlanıb, məhsullarımızı əldə ediblər.

Qeyd edək ki, satış sərgisindən əldə edilmiş bütün gəlir Braziliyada fəaliyyət göstərən xeyriyyə təşkilatlarına yönəldilir. Bu il, həmçinin sərgi nəticəsində əldə edilmiş maddi vəsaitin bir hissəsinin Braziliyanın Rio Qrande do Sul ştatında baş vermiş təbii fəlakətdən zərər çəkmiş yerli əhaliyə yardım üçün yönəldilməsi nəzərdə tutulub.

Baxış sayı: 95