Azərbaycan Bəstəkarlar İttifaqında vaxtaşırı olaraq müxtəlif elm və incəsənət xadimləri ilə görüşlər keçirilir. Burada əsas məqsəd elm, incəsənət və ictimai xadimlərin musiqi sənəti haqqında düşüncələri, musiqinin cəmiyyətdəki mövqeyi ilə bağlı fikir və mülahizələrinin bəstəkar və musiqişünaslarla dialoq şəklində aparılmasıdır. Çünki musiqi insanların mənəvi zövqünü formalaşdıran sənət növü olduğuna görə, onun cəmiyyətdə nüfuzunun qorunub saxlanılması və insanların peşəkar musiqi ilə maariflənməsi vacib məsələlərdəndir. Azərbaycan Bəstəkarlar İttifaqında Milli Məclisin deputatı, ictimai xadim Aydın Mirzəzadə ilə keçirilən görüşdə də məhz bu mövzulardan bəhs olunub.

İttifaqdan AZƏRTAC-a bildirilib ki, tədbirdə çıxış edən Azərbaycan Bəstəkarlar İttifaqının sədri, dünyanın “Sülh artisti”, AMEA-nın müxbir üzvü, Xalq artisti, professor Firəngiz Əlizadə Aydın Mirzəzadəyə görüşdə iştirakına görə təşəkkürünü bildirib və onun ictimai-siyasi fəaliyyətini yüksək dəyərləndirib.

Aydın Mirzəzadə çıxışında doğulub boya-başa çatdığı və onu formalaşdıran mühitdən bəhs edib. Aşıq Ələsgər şəcərəsindən olması, valideynlərindən aldığı mükəmməl ədəb-ərkan, müəllimlərinin sayəsində kamil elmi biliklərə yiyələnməsi və nəhayət,ictimaiyyətdə tutduğu mövqeyə qədər keçdiyi həyat yolundan maraqlı faktlarla söhbət açıb.

Milli Məclisin deputatı öz arxivində qoruyub saxladığı və əldə etdiyi nadir nüsxələri, hətta L.V.Bethovenin fortepiano sonatalarının ilk nəşrinin klavir şəklində variantını tədbir iştirakçılarına təqdim edib.

Tədbirdə Bəstəkarlar İttifaqının katibi, sənətşünaslıq üzrə elmlər doktoru, dosent Leyla Zöhrabova, Əməkdar incəsənət xadimi, professor Mehriban Əhmədova, sənətşünaslıq üzrə fəlsəfə doktoru,musiqişünas Səadət Təhmirazqızı çıxış edərək Aydın müəllimə öz təşəkkürlərini bildirib və belə görüşlərin əhəmiyyətindən danışıblar.

Qonağa Bəstəkarlar İttifaqı adından Üzeyir Hacıbəyli Beynəlxalq Musiqi Festivallarının elmi seminarlarından musiqişünasların çıxışları əsasında hazırlanmış məqalələr toplusu,“Heydər Əliyev və musiqi mədəniyyəti”, “İlham Əliyev və musiqi mədəniyyəti” (ideya müəllifi Firəngiz Əlizadə.Tərtibçi-müəllif Səadət Təhmirazqızı) kitabları hədiyyə edilib.