Sentyabrın 25-də Ankara Dövlət Opera və Balet teatrın səhnəsində Şərqin ilk qadın bəstəkarı Şəfiqə Axundovanın anadan olmasının 100 illiyinə həsr olunmuş qala-konsert keçirilib.

AZƏRTAC xəbər verir ki, konsert proqramı Beynəlxalq Türk Mədəniyyəti Təşkilatının (TÜRKSOY) XXV Balet Günləri çərçivəsində təşkil olunub.

Tədbirə fəal təşkilati dəstək ölkəmizin Ankaradakı səfirliyi nəzdində fəaliyyət göstərən Azərbaycan Mədəniyyət Mərkəzi və Türkiyənin Mədəniyyət və Turizm Nazirliyi tərəfindən göstərilib.

Konsertdən əvvəl çıxış edən Türkiyə Mədəniyyət və Turizm Nazirliyinin nümayəndələri mədəniyyətlərarası dialoqun gücləndirilməsinin vacibliyini vurğulayaraq, TÜRKSOY-un türk dünyası irsinin qorunub saxlanılması və təbliğinə verdiyi töhfəni qeyd ediblər. Türk dövlətlərinin, o cümlədən opera sənəti sahəsində birgə proqram və layihələrin həyata keçirilməsinin əhəmiyyəti vurğulanıb.

TÜRKSOY-un nümayəndələri Şəfiqə Axundova irsini bütün türk dünyasının ortaq irsi adlandırıb, onun Azərbaycan mədəniyyətinin inkişafındakı töhfəsini vurğulayıblar.

Azərbaycan, Qazaxıstan, Qırğızıstan, Özbəkistan, Türkiyə, Türkmənistan və Şimali Kipr Türk Cümhuriyyətindən olan opera müğənniləri Azərbaycan və klassik musiqinin məşhur əsərlərini ifa ediblər.

Türkiyə musiqisevərləri qarşısında Azərbaycan opera sənətinin nümayəndələri: bariton Anton Ferstandt, mezzo-soprano Nina Makarova və tenor Xosro Hakan Əmiri çıxış ediblər, onların ifasında Üzeyir Hacıbəylinin “Sənsiz” romansı, həmçinin “Karmen” və “Traviata” operalarından ariyalar səsləndirilib.

Konsertdə Ankarada akkreditə olunmuş diplomatik nümayəndəliklərin əməkdaşları, hərbi məktəblərin kursantları, Azərbaycan və Türkiyə ictimaiyyətinin nümayəndələri iştirak ediblər.

Ankara Dövlət Opera və Balet teatrının foyesində türk dövlətlərinin mədəni irsinə dair fotosərgi təşkil olunub.

Ramin Abdullayev

AZƏRTAC-ın xüsusi müxbiri

Ankara