Azərbaycan Kinematoqrafçılar İttifaqının (AKİ) aprelin əvvəlində elan etdiyi “AKİDocs – sənədli filmin inkişafı və pitçinq” beynəlxalq layihəsinə iştirakçıların seçimi başa çatıb və təlimlərə start verilib.

İttifaqdan AZƏRTAC-a bildirilib ki, sənədli filmlər üzrə mütəxəssis Tue Steen Müllerin mentorluğu ilə keçəcək təlimlərin ilk günü iştirakçılar və layihələrlə tanışlıq xarakteri daşıyıb.

İştirakçılar çəkmək istədikləri filmlər barədə məlumat verdikdən sonra T.S.Müller onların sənədli kino barədə düşüncələrini, təsəvvürlərini öyrənib, beynəlxalq platformalarda pitçinq prosesi, pitçinq üçün zəruri olan materiallar, layihələri pitçinqə hazırlamaq qaydaları haqqında danışıb.

Aprelin 29-na qədər davam edəcək “AKİDocs – sənədli filmin inkişafı və pitçinq” təlimlərinin növbəti günlərində iştirakçılarla fərdi ünsiyyət, layihələrin inkişafı və pitçinqə hazırlanması üzrə təlimlər təşkil olunacaq.

AKİ-nin “AKİDocs – sənədli filmin inkişafı və pitçinq” təlimlərində on bir layihə və beş dinləyici iştirak edir. Təlimlərin sonunda inkişaf etdirilmiş loqlayn və sinopsisləri olan iştirakçılar münsiflər heyətinin qarşısında öz layihələrini təqdim etməklə pul mükafatı qazanmaq üçün yarışacaqlar.

Qeyd edək ki, “AKİDocs – sənədli filmin inkişafı və pitçinq” beynəlxalq layihəsinin təlimçisi Tue Steen Müller 20 ildən çox qısametrajlı və sənədli filmlər üzrə mütəxəssis kimi “Danish Film Board”da işləyib, Baltik Film və Televiziya Festivalı, Filmkontakt Nord, Aİ və Avropa Sənədli Şəbəkəsinin Sənədli filminin həmtəsisçisi olub, 40-dan çox ölkədə sənədli kino üzrə təlimlər, seminarlar keçirib. 2007-ci ildən İtaliyada fəaliyyət göstərən Zelig Sənədli Kino məktəbinin müəllimidir.