Aprelin 16-da ADA Universitetinin rektoru professor Hafiz Paşayev Mədəniyyət Nazirliyi tərəfindən təsis edilmiş Mədəni və Yaradıcı Sənayelərin İnkişafı Mərkəzinin qonağı olub.

Mədəniyyət naziri Adil Kərimli Hafiz Paşayevə Yaradıcı Mərkəzdə yaradılan şərait barədə məlumat verib. Bildirilib ki, Mərkəzin əsas məqsədi gənc istedadların bacarıqlarının artırılmasına və yaradıcılıq potensialının reallaşdırılmasına şərait yaratmaq, mədəni və yaradıcı sənayelər (MYS) sahəsində layihələr həyata keçirmək, bu sahədə yeni startapların formalaşmasına, sahibkarlıq subyektlərinin inkişafına dəstək verməkdir. Mərkəzə həmçinin yerli yaradıcı məhsul və xidmətlərin hazırlanması və ixracının artırılması məqsədilə regionlardan istedadlı gənclər cəlb edilir.

Hazırda Yaradıcı Mərkəz tərəfindən bir sıra layihələr və inkubasiya proqramları həyata keçirilir. Musiqi, “Gametech”, “Cultech” proqramları çərçivəsində artıq 20-dən çox yeni startap yaradılıb və ümumilikdə 100-dək rezident Mərkəzin xidmətlərindən istifadə edir.

Adil Kərimli diqqətə çatdırıb ki, Mərkəzdə animasiya, musiqi və kino sənayesi, dizayn, yaradıcılıq sahələrində, eləcə də “Ai4Art” layihəsi çərçivəsində süni intellektin istifadəsi üzrə ustad dərsləri və təlimlər keçirilib. Bu təhsil proqramlarında 200-dən çox gənc iştirak edib. Mərkəzin tərkibinə həmçinin “Yaradıcı Market” bazar platforması, “Yaradıcı Edu.az” tədris mərkəzi də daxildir.

Daha sonra professor Hafiz Paşayev Mərkəzin müasir texnologiyalarla təchiz olunmuş foto və video, səsyazma, animasiya, rəqs və digər studiyaları ilə tanış olub.

Həmçinin Mədəniyyət Nazirliyi tərəfindən həyata keçirilən “Mədəniyyət və yaradıcı sənayelər üzrə xüsusi Təqaüd Proqramı” haqqında rektora ətraflı məlumat verilib. Bildirilib ki, Yaradıcı Mərkəzin tərəfdaşları arasında həm yerli qurumlar, təşkilatlar, həm də xarici beynəlxalq təşkilatlar yer alır.

Tanışlıq zamanı Mərkəzin rezidentləri öz startapları haqqında qonağa ətraflı məlumat veriblər.