İyunun 13-də Bakı Şəhər Mədəniyyət Baş İdarəsi A.Məlikov adına 11 nömrəli onbirillik musiqi məktəbinin şagirdləri “15 İyun - Milli Qurtuluş Günü”nə həsr olunan onlayn konsert təqdim edib.

Konserti məktəbin nəzəriyyə şöbəsinin müəllimi Pərvanə Rüstəmova açıq elan edərək 1993-cü il iyunun 15-nin Azərbaycan tarixinə Milli Qurtuluş günü kimi daxil olmasından və dövlətçiliyimizin yox olmaq təhlükəsindən xilas edilməsindən danışaraq, Azərbaycan xalqının ümummilli lideri Heydər Əliyevin öz xilaskarlıq missiyası ilə ölkəmizin müstəqilliyini qorumasından,respublikada tüğyan edən ictimai-siyasi böhranı aradan qaldırıb inkişafın təməlini qoymasından danışıb.

O, ümummilli lider Heydər Əliyevin 1993-cü il iyunun 15-də Azərbaycanda hakimiyyətə qayıdışının dövlətçilik tariximizin şanlı səhifəsini təşkil etməsindən danışaraq qədirbilən xalqımızın bu bayramı hər il yüksək əhval-ruhiyyədə qeyd etməsindən söz açıb.

Konsertdə məktəbin müxtəlif ixtisaslar üzrə təhsil alan şagirdlərinin ifasında Azərbaycan və xarici ölkə bəstəkarlarının əsərləri səsləndirilib.

Konsert əsl bayram əhval-ruhiyyəsində keçib.

Konsert məktəbin rəsmi “Youtube” hesabından yayımlanıb.