Hüseyn Abbaszadə 1922-ci il noyabrın 22-də Bakıda anadan olub. O, Azərbaycan Dövlət Teatr İnstitutunun teatrşünaslıq fakültəsində ali təhsil alıb. “Pioner”, “Göyərçin” jurnallarında, “Ədəbiyyat və incəsənət” qəzetində, Azərbaycan Yazıçılar İttifaqında çalışıb. Yazıçının iki dəfə Sovet İttifaqı Qəhrəmanı general Həzi Aslanova həsr olunmuş “General” romanı müharibə illərində Azərbaycan oğullarının qəhrəmanlığını bütün dolğunluğu ilə əks etdirən parlaq nəsr nümunəsidir. Yazıçının əsərləri də bir çox xalqların dillərinə tərcümə olunub, ölkəmizin hüdudlarından kənarda milli nəsri uğurla təmsil edib.

Hüseyn Abbaszadə qələminin məhsulu olan memuarlarda və publisistik məqalələrdə XX əsr Azərbaycan ədəbiyyatı və mədəniyyətinin görkəmli simalarının işıqlı obrazları öz əksini tapıb.

Hüseyn Abbaszadə “Şöhrət” ordeni ilə təltif olunub, Azərbaycanın Xalq yazıçısı, Əməkdar incəsənət xadimi fəxri adlarına layiq görülüb, Dövlət mükafatı laureatı, Azərbaycan Respublikası Prezidentinin fərdi təqaüdçüsü olub. Xalq yazıçısı 2007-ci ildə vəfat edib.