Oqtay Mirqasımov 12 iyun 1943-cü ildə Bakı şəhərində anadan olub. 1963-1968-ci illərdə Moskvada Ümumittifaq Dövlət Kinematoqrafiya İnstitutunun rejissorluq fakültəsində təhsil alıb. 

Təhsilini başa vurduqdan sonra Bakıya, “Azərbaycanfilm” kinostudiyasına qayıdıb.

Oqtay Mirqasımov bir neçə sənədli, bədii filmlərin quruluşçu rejissoru və ssenari müəllifidir. Filmləri bir çox beynəlxalq festivallarda mükafatlara layiq görülüb.

Oqtay Mirqasımov 1993-2001-ciillərdə “Azərkinovideo” İstehsalat Birliyinin baş direktoru vəzifəsində çalışıb. 2015-ci ildə Cəfər Cabbarlı mükafatına layiq görülüb. 7 iyun 2018-ci ildə “Şərəf” ordeni ilə təltif edilib. 2 avqust 2018-ci ildə Azərbaycan Respublikası Kinematoqrafçılar İttifaqının Milli Kino Mükafatı ilə təltif edilib.

Oqtay Mirqasımovun filmləri yüksək estetikası, vətənpərvərlik ideyası və intellektual yükü ilə fərqlənir. Onun filmlərində baş qəhrəman xalqın özüdür, çünki məhz cəmiyyəti narahat edən problemlər kino dili ilə müxtəlif rakurslardan təqdim edilir və tamaşaçıya problemlərin həlli istiqamətində ipucu da verilir. Yəni Oqtay Mirqasımov tamaşaçıya həyatımızı əks etdirən filmlərinə düşünərək yanaşmağı, onu içindən keçirib, vətənimizin rifahı istiqamətində hər bir vətəndaşın verə biləcəyi töhfənin isə məhz milli dəyərlərə sadiq qalaraq ümumbəşəri düşünməkdən keçdiyini təlqin edir.

Ona görə də sənətkarın kino əsərləri sanki şəxsiyyət və cəmiyyət prizmasından yanaşılmış portretlər qalereyasını xatırladır. İnsanın yaşantıları, inkişafı və dünyaya münasibəti, Oqtay müəllimə xas sərt ciddilik və incə yumorla təqdim edilir: “Qara Qarayev-60” (1978-ci il), “Əmək və qızılgül” (1962-ci il), “Dəniz” (1965-ci il), “Qobustan” (1967-ci il), “Bu, həqiqətin səsidir. Bəstəkar Qara Qarayev” (1968-ci il), “Azərbaycan haqqında etüd” (1969-cu il), “Cəfər Cabbarlı” (1969-cu il), “Gənclər festivalı” (1969-cu il), “Tatarıstanda Azərbaycan günləri” (1969-cu il), “Bakı haqqında 10 dəqiqə” (1970-ci il), “Xəzinə” (1970-ci il), “Müstəntiq və məntiq” (1971-ci il), “Gecə söhbəti” (1971-ci il), “Hörmətli alim yoldaşlar” (1971-ci il), “Nəriman Nərimanov” (1972-ci il), “1001-ci qastrol” (1974-cü il), “Rəşid Behbudov” (1975-ci il), “Əgər bir yerdəyiksə” (1975-ci il), “De ki, məni sevirsən!” (1977-ci il), “Dostluq səfəri” (1977-ci il), “Gecəniz xeyrə qalsın” (1977-ci il), “İşgüzar adamlar” (1977-ci il), “Leylək gözləyir” (1977-ci il), “Daha bir fənd” (1978-ci il), “Dantenin yubileyi” (1978-ci il), “Fənd” (1978-ci il), “Müqavilə” (1978-ci il), “Anlamaq istəyirəm” (1980-cı il), “Günlərin bir günü...” (1981-ci il), “Kallıq” (1981-ci il), “Gümüşü furqon” (1982-ci il), “Qaladan tapılan mücrü” (1982-ci il), “Əhməd haradadır?” (1983-cü il), “Qorunmağa möhtac qoruq” (1983-cü il), “Məğlubedilməzlər” (1983-cü il), “Yeddi qoyun nağılı” (1983-cü il), “Gedərgəlməz” (1984-cü il), “Vətəndaş, həkim, alim” (1984-cü il), “Cin mikrorayonda” (1985-ci il), “Cəza” (1986-cı il), “Dama dama...” (1986-cı il), “Şeytan göz qabağında” (1987-ci il), “Yenidənqurmanın işığında” (1988-ci il), “Öpürəm” (1988-ci il), “Günah” (1989-cu il), “Bir dəfə” (1990-cı il), “Azərbaycan kinosu – 80” (1996-cı il), “Kədərimiz... Vüqarımız...” (1998-ci il), “Kinorejissor Arif Babayev” (2000-ci il), “Şəhidlik zirvəsi” ( 2001-ci il), “Ovsunçu” (2002-ci il), “Mən kitabımı başlayıram” (2006-cı il), “Arzularını çəkən rəssam” (2007-ci il), “Qaşqayın son proqnozu” (2007-ci il), “Günaydın, mələyim!” (2008-ci il), “Silinməyən izlər” (2011-ci il), “Ağır illər… Xoş xatirələr” (2014-cü il), “Qisas almadan ölmə. Keçmişdən məktublar” (2014-cü il) və s. bədii, sənədli filmlərinin kinorejissoru, ssenari müəllifidir.

Oqtay Mirqasımov “Mozalan” satirik kinojurnalında da “777 №-li müəssisədə”, (1988-ci il, qısametrajlı bədii süjet-Mozalan № 129) “777 №-li sexdə” (1979-cu il) (qısametrajlı bədii süjet-Mozalan № 47), “Nəzarətin reydi “Mozalan”ın qeydi” (1977-ci il) və s. süjetlərin müəllifidir.