Çingiz Ələkbərzadə 1936-cı il oktyabrın 17-də Bakı şəhərində anadan olub. Tovuz şəhərindəki A.S.Puşkin adına şəhər orta məktəbini bitirib (1955). ADU-nun filologiya fakültəsində təhsil alıb (1955-1960).

Çingiz Ələkbərzadənin tələbəlik dövründə "Kökəlməyin sirri" hekayəsi almanaxda dərc olunub (1958). Bundan sonra dövri mətbuatda müntəzəm çıxış edib. Əmək fəaliyyətinə Əli-Bayramlı (indiki Şirvan) şəhərindəki 2 saylı orta məktəbdə müəllim kimi başlayıb (1960).

Çingiz Ələkbərzadə Azərbaycan Dövlət Televiziya və Radio Verilişləri Komitəsində son xəbərlər redaksiyasında işləyib (1961-1966). İsmayıllı rayonundakı İvanovka kəndində müəllim (1966-1968), Şirvan şəhərində çıxan "İşıq" qəzeti redaksiyasında məktublar şöbəsinin müdiri (1968-1971), İsmayıllı rayonunda "Zəhmətkeş" qəzeti redaksiyasında məktublar şöbəsinin müdiri (1971-1972), Azərbaycan SSR Televiziya və Radio Verilişləri Komitəsində "Günün səsi" xəbərlər baş redaksiyasında müxbir (1972-1973), "Azərbaycanfilm" kinostudiyasında ssenarist (1973-1975), "Kirpi" satirik jurnalında ədəbi işçi (1976-1979), Azərbaycan Dövlət Televiziya və Radio Verilişləri Komitəsində "Günün ekranı" redaksiyasında ştatdankənar müxbir (1979-1984), Şirvan bölgəsi üzrə xüsusi müxbir (1984-1989) olub.

Çingiz Ələkbərzadə “Yarpaqlar töküləndə”, (Bakı, “Uşaqgəncnəşr”, 1964, 120 səh), “Güllələr dənizdə sönür”, (Bakı: “Gənclik”, 1973, 138 səh.); “Qızıl yəhərli at”, (Bakı: “Gənclik”, 1976, 135 səh.), “Çılpaqlı” (roman), (Bakı: “Gənclik”, 1979, 176 səh.), “Vulkan” (povest və hekayələr), (Bakı: “Yazıçı”, 1983, 181 səh.), “Öndən”, (Bakı: “Yazıçı”, 1992, 214 səh.), “Qumarbaz”, (Bakı: “Azərnəşr”, 1993, 295 səh.), “Türmə mənim ahımdı”, (Bakı: “Gənclik”, 1993, 78 səh.) kitablarının müəllifidir.

Çingiz Ələkbərzadə Özbəkistanda keçirilən Azərbaycan ədəbiyyatı və incəsənəti ongünlüyündə iştirak edib (1980). Durğunluq dövründə ictimai qüsurları kəskin tənqid etdiyinə görə həbs edilib (1986-1988). Sonra bəraət alıb, bədii yaradıcılıqla məşğul olub.

Ədibin filmoqrafiyasında “Günlərin bir günü” (1976), “Vulkana doğru” (1977) filmləri yer alıb.

Çingiz Ələkbərzadə 1999-cu il yanvarın 7-də vəfat edib.