Bakıdakı Rus evində yaradıcılığı bizi tale, seçim və dəyişikliklər haqqında fəlsəfi düşüncələrə qərq edən rəssam Mehriban Şəmsədinskayanın “Bəxt çarxı” adlı fərdi sərgisinin açılışı olub.

“Bəxt çarxı” daimi hərəkətin rəmzidir. Hər yeni dönüş daha güclü, daha uğurlu və daha yaxşı olmaq üçün fürsət yaradır.

Mən çətin anlarda belə ümid və yenilənmə üçün yerin olduğunu göstərmək istədim”, - deyə layihənin müəllifi sərgidən əvvəl AZƏRTAC-ın müxbirinə bildirib.

Rəsmlər zəngin bir palitrada işlənib, burada parlaq kontrastlar pastel çalarları ilə ahəngdar şəkildə tamamlanıb.

Onun yaradıcılığı Paris, London və Bakıda həyata keçirilən beynəlxalq layihələr də daxil olmaqla, bir çox sərgilərdə təqdim olunub.

2010-cu ildə beynəlxalq onlayn sərgidə rəssamın “Solitude in a cage” adlı fotosu “Ən yaxşı texniki ifa” nominasiyası üzrə mükafatlandırılıb.

Rəssam həm də art-terapevt kimi çalışdığı Psixi Sağlamlıq Mərkəzində “Xoşbəxtlik ağacı” art-obyektinin müəllifi kimi tanınıb. Onun sənətinə rəssamlıq, videoart və insan qavrayışının sərhədlərini araşdıran konseptual qurğular daxildir.

O deyib ki, onun fəaliyyəti həm Azərbaycanda, həm də xaricdə qazanılmış təcrübəyə əsaslanıb. Bu, ona həm incəsənət dünyasında aktual olmağa, həm də art-terapiya istiqamətini fəal şəkildə inkişaf etdirməyə kömək edib.

“Mən həqiqətən də hesab edirəm ki, incəsənət sağaldır. Art-terapiya vasitəsilə insanlara harmoniya tapmağa və özlərini ifadə etməyə kömək edirəm. Hər bir insan şəkil çəkməlidir - bu, təkcə yaradıcılıq deyil, həm də daxili duyğuların öhdəsindən gəlmək üçün bir yoldur”, - deyə istedadlı rəssam sözlərini yekunlaşdırıb.