İtaliyanın şimalında yerləşən məşhur Venesiya əfsanəyə görə, məhz bu gün, 421-ci ilin martın 25-də yaranıb. Venesiya sakinləri də bu fikrə sadiq qalaraq, hər il tarixi günü qeyd edirlər.

Hazırda Venesiya öz orta əsrlər görkəmini dəyişməz olaraq saxlamış demək olar ki, yeganə şəhərdir. Venesiyanın tarixi mərkəzi Venesiya körfəzinin bir-birindən 150 kanal və axarla ayrılmış 118 adasında yerləşir, onların üzərindən 400-ə yaxın körpü salınıb.

Venesiyanın sənaye-liman hissəsi isə materikdədir. Burada gəmi təmiri və gəmiçilik, əlvan metallurgiya, kimya, neft emalı, elektrotexnika və yüngül sənaye inkişaf edib. Burada şüşədən istehsal olunan bədii məmulatlar (Murano adası, muzey), krujeva (Burano adası), mozaika da dünyada məşhurdur. Venesiyada universitet, konservatoriya, muzeylər (o cümlədən İncəsənət Akademiyasının qalereyası), teatrlar var. Məsələn, ilk açıq opera teatrı (1637-1812), “Feniçe” Opera Teatrı (1792) tanınmış sənət ocaqlarındandır.

Venesiya adası – dəniz kurortu, dünya əhəmiyyətli beynəlxalq turizm mərkəzi, bir çox beynəlxalq kinofestivalların, incəsənət və memarlıq sərgilərinin keçirildiyi yerdir. Şəhərdaxili daşımalar mühərrikli gəmilər, qondolalar, barjalar, qayıqlar vasitəsilə həyata keçirilir.

Bu şəhərin yaranması haqqında əfsanəyə görə, körfəzin suları aralanıb və əsrarəngiz, təsvirə gəlməyən gözəlliyə malik şəhər meydana gəlib. Başqa, həqiqətə daha çox uyğun gələn əfsanədə isə xarici istilaçılardan daldalanmaq istəyən qonşu sahillərin sakinləri körfəz adalarında məskunlaşıblar və beləliklə bu əfsanəvi şəhərin özülünü qoyublar.